Nga partia e Hristijan Mickoskit, thonë se Talat Xhaferi nuk është i denjë për postin e kryeministrit teknik të Qeverisë pasiqë ai dezertoi nga ARM-ja për t’u bashkangjitur me Uçk-në, përcjellë Klan M.
“Dimitar Kovaçevski dhe LSD janë partnerë pakicë në qeverinë e BDI-së dhe Ali Ahmetit. Me mbështetjen e tij që Talat Xhaferi të jetë kryeministër, Kovaçevski konfirmoi atë që VMRO-DPMNE e ka thënë vitet e fundit, se është i gatshëm të pranojë gjithçka që BDI-ja dhe Ahmeti i ofrojnë, vetëm për të vazhduar bizneset dhe krimin. Talat Xhaferi është i padenjë për postin e kryeministrit teknik të qeverisë. Talat Xhaferi nuk mund të pritet që të organizojë zgjedhje të ndershme dhe demokratike, sepse si kryetar i Kuvendit ka shkelur Rregulloren dhe procedurat, ka mbyllur derën e seancës plenare që të mos lejohen të flasin deputetët e tjerë dhe me këtë ka shkelur demokracinë. Xhaferi nuk mund të jetë kryeministër sepse dezertoi nga Ushtria e Maqedonisë në vitin 2001. Xhaferi nuk mund të jetë kryeministër sepse bllokoi ligjin për “branitellët” maqedonas. Talat Xhaferi është i padenjë për këtë pozitë sepse i gjithë opinioni në Maqedoni e dëgjoi se si ai iu drejtua parlamentarëve me sharje, fyerje dhe kërcënime. Në çdo vend normal, Xhaferi tani do të ishte dërguar në pension politik, e jo të emërohej kryeministër teknik i Maqedonisë. Vetëm dezertori Kovaçevski mund të pranojë një tjetër dezertor si Talat të menaxhojë qeverinë”, thonë nga VMRO-DPMNE. /
