Kritiku i Kremlinit, Alexei Navalny, ka përdorur rrjetet sociale për t’u bërë thirrje mbështetësve që të mos shqetësohen për të.
Në një mesazh për herë të parë që nga 6 dhjetori, Navalny konfirmoi mbërritjen në një burg të Arktikut dhe tha se ishte në humor të mirë. Ekipi i tij nuk kishte pasur asnjë kontakt me të prej disa javësh, ndërsa ai po zhvendosej nga rajoni Vladimir në lindje të Moskës, në një tjetër burg në Kharp, në rajonin Yamal-Nenets; një zonë e njohur për dimrat e ashpër.
Zoti Navalny shkruajti se ishte transportuar nën masa të rrepta sigurie dhe përgjatë një trajektoreje aq të çuditshme, sa që nuk mendonte se do të bëhej e ditur vendndodhja e tij deri në janar.
Navalny tha në X, se ai ishte “Babagjyshi i ri”. IK-3 ose i quajtur ndryshe “Ujku Polar”, shihet si një nga burgjet më të vështira në Rusi dhe shumica e të burgosurve të mbajtur atje janë dënuar për krime të rënda.
“Më thanë se menduat se më humbët, madje disa prej jush ishin të shqetësuar. Faleminderit shumë për mbështetjen tuaj!“- shkroi ai. “Mos u shqetësoni për mua, unë jam mirë.”
Një zëdhënëse e zotit Navalny, Kira Yarmysh, tha të hënën se avokati i tij ishte lejuar ta takonte në objektin e ri. Sipas Yarmysh, largimi i zotit Navalny në vendndodhjen e re synon izolimin e tij.
“Alexei, megjithëse mbahet në burg, vazhdon të jetë kundërshtari kryesor i Vladimir Putinit. Ai është personi që i reziston më shumë se çdokush tjetër dhe kështu motivon të tjerët që të rezistojnë. Prandaj nuk është befasi që e transferuan tashmë në një tjetër burg, që të mos ia ndalojë dot Putinit të bëjë fushatën elektorale dhe në vazhdim të manipulojë edhe zgjedhjet”- tha zonja Yarmysh.
Navalny u arrestua në vitin 2021 pas kthimit nga Gjermania, ku u kurua pas helmimit me një agjent nervor, për të cilin ka fajësuar Kremlinin. Ai i ka refuzuar të gjitha akuzat ndaj tij si të motivuara politikisht.
