Një zjarr i madh ka shpërthyer sonte në zonën industriale të Vizbegut, pranë pikës së karburantit “Hib Petrol”. Sipas informacioneve të para, flakët kanë përfshirë katër kamionë, ndërsa ende nuk ka të dhëna të sakta për ndonjë të lënduar apo për shkaqet e mundshme të zjarrin.
Ekipet e Zjarrfikësve janë në terren dhe po punojnë për të lokalizuar zjarrin dhe për të parandaluar përhapjen e tij në zona të tjera. Aktualisht, situata mbetet dinamike dhe autoritetet janë të angazhuara për të kontrolluar zjarrin që ka shpërthyer në afërsi të një pike të rrezikshme të karburantit.
Sipas Qendrës për Menaxhimin e Krizave (QMK), alarmi është dhënë në orën 21:14 përmes numrit të emergjencës 112, ku është raportuar zjarr në dy kamionë në kompaninë “ATLANTIC” në lagjen Vizbeg. Në njoftimin fillestar është theksuar se ka pasur rrezik që edhe kamionë të tjerë të përfshiheshin nga flakët, ndërsa pika e karburantit “Hib Petrol” ndodhet vetëm disa metra më tutje.
Zjarrfikësit janë njoftuar menjëherë dhe po ndërhyjnë për të ndaluar përhapjen e flakëve dhe për të siguruar zonën, ndërkohë që hetimet për shkakun e zjarrit ende vazhdojnë.
