Nga sot banorët e komunës së Zhelinës nuk do të kenë nevojë të shkojnë në Tetovë për nxjerrjen e dokumenteve personale, pasi ato mund t’i nxjerrin në zyrën e re, e cila u hap në Grupçin. Kreu i komunës së Zhelinës, Blerim Sejdiu, tha se ketë kërkesë e kishte bërë nga viti 2018, por që përgjigjja ka qenë negative.
“E kam patjetër ta përmendi se daton që nga viti 2018 dhe që atëherë kemi hasur në veshë të shurdhër dhe nuk ka pasur realizim edhe pse kaluan shtatë vite. Ky hap na gëzon të gjithëve, sepse unë si kryetar komune kam kërkuar vazhdimisht që kjo kërkesë të bëhet realitet, sepse kërkesat tona bazohen në kërkesat e bashkëqytetarëve tanë.”, – deklaroi kryetari i komunës së Zhelinës, Blerim Sejdiu.
Ministri i Punëve të Brendshme, Pançe Toshevski, tha se edhe në komunën e Bogovinës dhe të Bervenicës do të hapen zyra të Shërbimeve Administrative për nxjerrje të dokumenteve personale.
“Me përkrahje të bashkëqeverisjes lokale të Zhelinës dhe në bashkëpunim të ngushtë edhe me kreun e komunës së Tetovës, Bilall Kasami, realizuam një ide të përbashkët që e patëm që para zgjedhjeve. Atë që e premtuam po e realizojmë dhe ofrojmë MPB-në më afër qytetarëve bashkë me të gjitha shërbimet në kuadër të MPB-së. Kemi folur në këtë temë edhe me kreun e komunës së Bogovinës dhe shpejt do ta realizojmë këtë shërbim edhe atje, pra bisedohet edhe për Bervenicën dhe gjithkund ku do jetë e nevojshme do të hapim zyrat e këtilla që të ofrojmë shërbimet e MPB-së për qytetarët, sepse tek e fundit për ta ekzistojmë.”, – theksoi ministri i MPB-së, Pançe Toshkovski.
Toshkovski më tej shtoi se letërnjoftimet me emrin e vjetër të shtetit Republika e Maqedonisë do të jenë të vlefshme deri në skadimin e afatit. Ndërkohë tha se edhe për patentë shoferët vlen i njëjti mendim dhe kërkoi nga policia që mos t’i dënojë qytetarët, por le t’i paralajmërojë për situatën.
