Ministria e Arsimit dhe Shkencës vazhdon me aktivitetet investuese për përmirësimin e kushteve infrastrukturore për edukim më cilësor dhe avancim të standardit të nxënësve dhe studentëve. Këtë vit, përveç vazhdimit të rekonstruimit të konvikteve shtetërore studentore, do të fillojë edhe rinovimi i thellë i shkollave shtetërore me qendra burimore, të cilat janë shtyllë e inkluzivitetit në sistemin kombëtar arsimor.
Për këtë qëllim, nga Banka Gjermane për Zhvillim KfW, ndërsa me mbështetjen e Bashkimit Evropian përmes Kornizës Investuese për Ballkanin Perëndimor, janë siguruar mjete në lartësi prej 40 milionë eurosh. Buxheti me të cilën do të realizohet faza e dytë e procesit të rinovimit të thellë dhe me efikasitet energjetik të shtatë konvikteve shtetërore studentore të mbetura, duke pasur parasysh se konviktet “Kuzman Josifovski Pitu” dhe “Stiv Naumov” janë në fazë aktive të rinovimit, ndërkohë paralelisht do të rindërtohen edhe objektet e shtatë shkollave shtetërore me qendra burimore për nxënës me nevoja të veçanta arsimore.
Në mënyrë shtesë, për mbulimin e shpenzimeve të lidhura me përgatitjet për rekonstruimin e qendrave burimore, siç janë kontrollet energjetike, projektet e detajuara dhe procedurat e tenderimit për rindërtimin energjetikisht efikas, përmes Programit për Efikasitetin Energjetik Rajonal për Ballkanin Perëndimor, mbështetur nga Bashkimi Evropian, është siguruar grant jo i kthyeshëm në vlerë prej 1,25 milionë eurosh.
Marrëveshjet për përdorimin e mjeteve i nënshkruan ministrja e Arsimit dhe Shkencës, prof. dr. Vesna Janevska, ministrja e Financave, Gordana Dimitrieska Koçoska dhe Pablo Alvarez Obrador – drejtor për energjetikë për Evropën Juglindore dhe Turqinë në Bankën Gjermane për Zhvillim KfW, ndërsa në pjesëmarrje të Stefan Hudolin – udhëheqës i sektorit për bashkëpunim në Delegacionin e Bashkimit Evropian në Shkup, dhe zëvendësambasadorit të Republikës Federale të Gjermanisë, Jan-Aksel Fos.
Ky aktivitet i madh investimi është hap i rëndësishëm në avancimin e kushteve të jetesës dhe të të nxënit të të rinjve në Maqedoni, duke nxitur gjithpërfshirjen, duke rritur efikasitetin energjetik të objekteve publike dhe duke ulur ndjeshëm emetimet e CO₂.
Zgjerohet programi investues i MASh – përveç konvikteve studentore, këtë vit do të rekonstruohen edhe shkollat shtetërore me qendra burimore.
