Zgjedhjet lokale të së dielës do të monitorohen nga 1.341 vëzhgues, nga të cilët 700 janë vendas dhe 639 janë ndërkombëtarë, si dhe dy gazetarë të huaj. KSHZ-ja në seancën e sotme akreditoi 30 vëzhgues me kërkesë të ambasadës amerikane në Shkup, dy gazetarë të televizionit shtetëror turk, 51 vëzhgues të Shoqatës Wake Up, një vëzhgues nga Qendra Kombëtare e Romëve dhe Bashkimi Kombëtar për Barazi Gjinore.
“Vëzhguesit e akredituar do të marrin autorizime dhe karta identifikimi që duhet t’i mbajnë me vete kur vizitojnë qendrat e votimit. Çdo vëzhgues i akredituar duhet t’i përmbahet kodit të rregullave për vëzhgimin e zgjedhjeve dhe procedurës zgjedhore të miratuar nga KShZ-ja.”, – deklaroi anëtarja e KShZ-së, Svetllana Karapetrova.
KShZ-ja do ta dorëzojë materialin zgjedhor deri te Komisionet Komunale të enjten dhe të premten. Lidhur me planin e punës së KShZ-së, kryetari Boris Kondarko sqaroi se pas shpalljes së rezultateve fillestare jozyrtare të marra në rrugë elektronike, të hënën KShZ-ja do të zbatojë planin e përpiluar për grumbullimin e materialit votues.
“Të hënën, herët në mëngjes, Komisionet Komunale Zgjedhore do të vijnë në grupe të caktuara dhe do të dorëzojnë procesverbalet origjinale këtu në KShZ, pas së cilës do të organizojmë një kontroll përkatës. Të hënën në mbrëmje, KShZ-ja do të shpallë rezultatet fillestare zyrtare bazuar në procesverbalet origjinale të shkruara nga çdo vendvotim dhe çdo komision zgjedhor komunal.”, – theksoi kryetari i KShZ-së, Boris Kondarko.
Opinioni do të informohet për të gjitha detajet e procesit zgjedhor, ndërkaq në ditën e votimit do të ketë informacione në çdo dy orë për jehonën e votuesve.
