Thirrjet raciste dhe anti-shqiptare që u dëgjuan gjatë një ndeshjeje basketbolli në qytetin e Kumanovës kanë shkaktuar reagime të ashpra në opinionin publik. Një nga reagimet më të qarta erdhi nga zëvendëskryeministri i Maqedonisë së Veriut, Izet Mexhiti.
Në një deklaratë publike, Mexhiti theksoi:
“Thirrjet raciste dhe anti-shqiptare të dëgjuara gjatë ndeshjes në Kumanovë janë të neveritshme dhe të dënueshme. Kjo gjuhë e urrejtjes nuk i shërben askujt dhe cenon kohezionin tonë si shoqëri shumetnike.”
Ai shtoi se Maqedonia e Veriut është shtëpi e përbashkët për të gjithë qytetarët dhe se askush nuk duhet të ndihet i përjashtuar apo i sulmuar për shkak të përkatësisë së tij etnike:
“Maqedonia e Veriut është vend i përbashkët për maqedonas, shqiptarë, turq, romë, boshnjakë, vllahë dhe të tjerë. Të gjithë kemi të drejtë për respekt dhe dinjitet.”
Zëvendëskryeministri gjithashtu theksoi se sporti duhet të jetë mjet për bashkim dhe jo për nxitje përçarjeje:
“Sporti duhet të na bashkojë, jo të na ndajë. Thirrjet me frymë fashiste nuk përfaqësojnë askënd dhe nuk guxojnë të përsëriten më. Institucionet duhet të reagojnë menjëherë për të parandaluar raste të tilla në të ardhmen.”
Ngjarja ka ngjallur reagime të shumta në rrjetet sociale dhe shoqëria civile po kërkon përgjegjësi nga organizatorët dhe institucionet kompetente për të parandaluar përhapjen e gjuhës së urrejtjes në ambiente sportive dhe publike.
