Në organizim të Këshillit për Bashkëpunim Rajonal (KBR), me mbështetjen e Ministrisë së Punëve të Jashtme dhe Bashkëpunimit Ndërkombëtar të Italisë (MAEÇI) dhe Ministrisë së Punëve të Brendshme të Italisë dhe në partneritet me Qeverinë e Republikës së Maqedonisë së Veriut, sot në Shkup u hap solemnisht Konferenca e 10-të Jubilare Vjetore për Koordinimin e Sigurisë në Ballkanin Perëndimor me moton „Ballkani Perëndimor – BE: Siguri e Përbashkët, e Ardhme e Përbashkët“. Maqedonia e Veriut, si vend pritës, e konfirmon rolin udhëheqës në iniciativat rajonale të sigurisë.
Zëvendëskryeministri i Qeverisë përgjegjës për politikat e qeverisjes së mirë, z. Arben Fetai, iu drejtua audiencës në sesionin hapës bashkë me Sekretarin e Përgjithshëm të KBR-së, z. Amer Kapetanoviç, Zëvendësdrejtorin e Përgjithshëm për Siguri Publike të Italisë, z. Stefano Gambacurta, dhe Ambasadorin e Italisë, Sh.T. Paolo Palminteri.
Zëvendëskryeministri Fetai në fjalimin e tij theksoi se „Siguria nuk lind nga frika, ajo rritet nga besimi. Kur institucionet janë transparente dhe të përgjegjshme, zvogëlohet hapësira për abuzim, korrupsion dhe arbitraritet“. Sipas tij, besimi është fjala përcaktuese e kohës sonë. Ai është monedha e re e qeverisjes moderne, më e vlefshme se çdo tjetër, sepse pa të nuk ka përparim ekonomik, stabilitet politik apo reforma institucionale.
Konferenca zhvillohet në një moment kyç kur BE-ja po i intensifikon përpjekjet për Bashkimin Evropian të Mbrojtjes, zgjerimin e Shengenit dhe Planin e Rritjes. Italia e ripohon përkushtimin ndaj rajonit, ndërsa Maqedonia e Veriut tregon lidership në harmonizimin me standardet evropiane të sigurisë. "E ardhmja e përbashkët e Ballkanit dhe Evropës nuk do të matet me numrin e traktateve që nënshkruajmë, por me thellësinë e besimit që ndërtojmë mes shteteve, institucioneve dhe qytetarëve tanë.", shtoi Fetai, duke theksuar nevojën për ndërtimin e një kulture të re të sigurisë – më njerëzore, më bashkëpunuese dhe më evropiane.
Nesër, më 12 nëntor, do të zhvillohen grupe punuese paralele për migracionin, krimin e organizuar dhe kërcënimet kibernetike, të cilat do të dalin me rekomandime konkrete për hapat e ardhshëm. Kjo konferencë është forumi më i madh rajonal për siguri dhe sinjal i qartë se Ballkani Perëndimor është faktor aktiv, jo thjesht përfitues i sigurisë evropiane.
