Presidenti i Ukrainës Volodymyr Zelensky tha se nuk sheh asnjë shenjë se Rusia është gati për një samit trepalësh midis tij, presidentit të SHBA-së Donald Trump dhe homologut të tij rus Vladimir Putin.
Ai gjatë një konference të përbashkët për shtyp me kreun e Komisionit Evropian Ursula von der Leyen deklaroi se “në këtë fazë, nuk ka asnjë shenjë nga Rusia se do të zhvillohet një samit trepalësh”, raporton KosovaPress.
Presidenti ukrainas tha se vijat aktuale të frontit në luftën e vendit të tij me Rusinë duhet të jenë baza për bisedimet e paqes.
“Ne kemi nevojë për negociata të vërteta, që do të thotë se mund të fillojmë aty ku është vija e frontit tani,” tha Zelensky, duke shtuar se udhëheqësit evropianë e mbështesin atë.
Zelensky përsëriti qëndrimin e tij se është e nevojshme të vendoset një armëpushim në mënyrë që më pas të negociohet një marrëveshje përfundimtare.
“Është e rëndësishme që Uashingtoni të jetë me ne”, tha udhëheqësi ukrainas.
Zelensky udhëtoi për në Bruksel për të marrë pjesë në një video-konferencë të “koalicionit të të vullnetshmëve”, e cila bashkon mbështetësit e Kievit, përfshirë presidentin francez Emmanuel Macron, kryeministrin britanik Keir Starmer dhe kancelarin gjerman Friedrich Merz.
Ai më pas do të niset drejt Uashingtonit së bashku me udhëheqësit evropianë për t’u takuar me Donald Trump.
“Nuk e di saktësisht se çfarë diskutuan Putin dhe presidenti Trump gjatë samitit të tyre në Alaska. Dhe do të doja që presidenti Trump të ndante shumë detaje me mua dhe udhëheqësit evropianë. Ajo që na tha presidenti Trump për garancitë e sigurisë për mua është shumë më e rëndësishme sesa mendimet e Putin. Sepse Putin nuk do të na jep asnjë garanci sigurie”, tha Zelensky.
Udhëheqësi ukrainas tha gjithashtu se homologu i tij rus Vladimir Putin, ka “shumë kërkesa” për t’i dhënë fund luftës në Ukrainë, por se ai “nuk i di të gjitha”.
“Nëse ka vërtet aq shumë sa kemi dëgjuar, atëherë do të duhet kohë për t’i shqyrtuar të gjitha”, tha ai.
