Në pikën kufitare mes Maqedonisë së Veriut dhe Kosovës, Bllacë–Han i Elezit, u hodh një hap i rëndësishëm drejt thellimit të bashkëpunimit rajonal me inaugurimin e sistemit të përbashkët kufitar “One Stop Shop”.
Zëvendësministrja e Transportit, Kaltrina Zekolli-Shaqiri, në një postim në Facebook theksoi rëndësinë e këtij zhvillimi duke e quajtur atë “një simbol i qartë se Ballkani po zgjedh të ecë përpara, me më shumë bashkëpunim dhe më pak barriera”.
“Ky nuk është vetëm një model efikas, por një mesazh shprese: që kufijtë nuk duhet të na ndajnë, por të na lidhin. Sepse integrimi nuk është qëllim politik, por mision i përbashkët për një të ardhme më të drejtë dhe evropiane. Ballkani nuk pret Evropën. Ballkani është Evropë”, u shpreh Zekolli-Shaqiri.
