Në Rashçe të Komunës së Sarajit kanë filluar punimet për rikonstruimin e rrugës lokale që lidh Rashçen me fshatin Kopanicë.
Zëvendësministrja e Transportit dhe Lidhjeve, Kaltrina Zekolli Shaqiri së bashku me deputeten e zonës, Feride Haxhiu dhe kryetarin e Komunës së Sarajit, Muhamet Elmazi kanë shënuar nisjen e këtij projekti të rëndësishëm për banorët.
“Në Rashçe të Komunës së Sarajit filluam punimet për rikonstruksionin e rrugës lokale që lidh Rashçen me fshatin Kopanicë. Së bashku me deputeten e zonës, znj. Feride Haxhiu, dhe kryetarin e Komunës së Sarajit, z. Muhamet Elmazi, shënuam nisjen e këtij projekti të rëndësishëm për banorët”, ka theksuar Zekolli Shaqiri.
Projekti kap vlerën mbi 20 milionë denarë dhe është i financuar plotësisht nga Ministria e Transportit, ndërsa pritet të realizohet brenda një viti.
“Rruga, me gjatësi 1.745 metra dhe gjerësi 3.5 metra, do të përmirësojë qarkullimin, sigurinë dhe lidhjen ndërmjet dy vendbanimeve”, ka shtuar Zekolli.
Sipas saj investimet në infrastrukturën lokale mbeten prioritet i kësaj qeverie ku bën pjesë edhe VLEN.
“Investimet në infrastrukturën lokale mbeten prioritet i yni si Qeveri VLEN, sepse zhvillimi i vërtetë fillon nga përmirësimi i jetës së përditshme të qytetarëve”, ka theksuar zëvendësministrja Zekolli Shaqiri.
