Fondi i Sigurimeve Shëndetësore dhe Drejtoria e të Ardhurave Publike kanë kryer kontrolle në 49 klinika gjinekologjike private dhe përcaktuan se 26 nga to nuk kishin parregullsi. Kontrollet kryesore treguan se parregullsitë ishin të pranishme në 23 klinika gjinekologjike.
Këto kontrolle, sipas drejtorit të Fondit të Sigurimeve Shëndetësore, Sasho Klekovski, kanë ardhur pas ankesave të shumta nga pacientët dhe ky është veprimi i parë i tillë që nga viti 2012.
“Kontrollet, EHO, Kolposkopinë, gjetjet mikrobiologjike, duhet të jenë pa pagesë dhe nuk duhet të jenë të paguar ndaj qytetarëve, të cilët kanë sigurim shëndetësor dhe të gjitha reagimet kanë ardhur në këtë drejtim, se janë detyruar të paguajnë, edhe pse ordinancat private kanë marrëveshje të nënshkruar me Fondin për Sigurim Shëndetësor. Ne, pas çdo reagimi që marrim, veprojmë përmes ekipeve tona mobile, por kësaj here kishte aq shumë reagime, ku është dashur të bëjmë një operacion më të gjerë, por këtu janë, përfshi edhe ordinancat, ndaj të cilëve nuk ka pasur reagime.”, – deklaroi drejtori i Fondit të Sigurimeve Shëndetësore, Sasho Klekovski.
Sipas Klekovskit, 23 ordinanca morën sanksione, pjesërisht për pagesë për shërbimet që duhet të jenë falas dhe pjesërisht për mbajtjen e pahijshme të të dhënave. Paralelisht edhe Drejtoria e të Ardhurave Publike përcaktoi se 20 institucione private gjinekologjike nuk lëshonin fatura fiskale.
Drejtoresha Elena Petrova u bëri thirrje pacientëve që të kërkojnë gjithmonë një faturë fiskale për shërbimin e ofruar.
“Edhe pse shërbimet shëndetësore janë të liruara nga TVSh-ja, ndërsa pjesa më e madhe e këtyre ordinancave paguajnë një shumë minimale të tatimit të fituar vjetor prej 1 për qind apo janë edhe tërësisht të liruara për t’u tatimuar, kjo nuk do të thotë se mos evidentimi i shumës së fituar nuk ka asnjë efekt negative, përkundrazi, mos evidentimi i qarkullimit dhe i të ardhurave, lë hapësirë për shfrytëzimin e tyre si të ardhura personale të pataksuara, duke blerë pronë personale nga të ardhurat e pataksuara dhe në njërën anë, duke lënë hapësirë për blerje me para në dorë që ushqejnë drejtpërdrejt ekonominë në të zezë.”, – theksoi drejtoresha e Drejtorisë për të Ardhurat Publike, Elena Petrova.
Sipas përfaqësuesit e këtyre dy institucioneve, kontrollet u kryen në Shkup, Manastir, Prilep, Tetovë, Shtip dhe Strumicë, ndërsa qëllimi, siç u theksua, është që pacientët të marrin shërbime në përputhje me ligjin dhe marrëveshjet me Fondin.
Drejtori i Përgjithshëm i Fondit, Sasho Klekovski, informoi se FSSh-ja ka lidhur marrëveshje me gjithsej 149 institucione private të kujdesit shëndetësor për ofrimin e kujdesit shëndetësor primar në fushën e gjinekologjisë. (Fitim Kryeziu, TVM2)
