Ishulli italian Sardenja është plot me pasuri dhe peizazhe mahnitëse, por është gjithashtu i pasur me histori.
Gjatë xhirimeve të një dokumentari, shkencëtarët gjetën prova të rëndësishme paleontologjike në fshatrat përreth Bauneit, në Ogliastra: gjurmë fosile që dëshmojnë për praninë e dinozaurëve në Sardenjë.
Zbulimi u bë nga një ekip shkencor i përbërë nga profesorët Antonio Assorgia, Sergio Ginesu dhe Stefania Sias, ish-ligjërues në universitetet e Sassarit dhe Cagliarit.
Të ruajtura në shkëmbinj që datojnë që nga periudha Jurasik, gjurmët i përkasin një dinozauri theropod që nuk është raportuar më parë në Sardenjë.
Dinozauri ishte një dykëmbësh nga periudha e Jurasikut të Mesëm, rreth 165 milionë vjet më parë, dhe jetonte përgjatë vijës bregdetare. Kjo u shpjegua nga ekspertët në një konferencë për shtyp të premten.
Stefania Sias, e para që i vuri re ato gjurmë, tha se dinozauri i zbuluar quhej ‘Bibi’ dhe do të ishte një ekzemplar femër, por duhet pritur prova shkencore për ta vërtetuar.
“Gjurmët e këmbëve na flasin dhe na tregojnë se si ishin gjërat 165 milionë vjet më parë, ajo nga Baunei ishte ndoshta një barngrënës, duke pasur parasysh mungesën e kthetrave dhe ishte një dykëmbësh rreth 120-160 centimetra i gjatë,” tha paleontologu dhe pedagogu në Universitetin e Sassarit, Marco Zedda.
Sipas Francesco Ginesu, drejtor i kompanisë MGB dhe përgjegjës për prodhimin e dokumentarit, ky zbulim i jashtëzakonshëm doli pothuajse rastësisht, transmeton KosovaPress.
“Gjurmët rezultuan të ishin një gjetje me vlerë të madhe shkencore. Nuk është vetëm një pjesë tjetër e të dhënave: është dëshmi e drejtpërdrejtë e pranisë së dinozaurëve në një zonë që deri më tani nuk kishte dëshmi të tilla.”
