Ish-kryeministri Zoran Zaev, përmes një statusi në Facebook, ka deklaruar se pas pesë vitesh heshtje është i gatshëm të reagojë me padi ndaj deputetit Brane Petrushevski dhe partisë VMRO-DPMNE, nëse nuk kërkojnë falje për, siç thotë ai, gënjeshtrat, fyerjet dhe shpifjet e vazhdueshme të bëra në adresë të tij.
“Që prej pesë vitesh jam jashtë politikës, pasi dhashë dorëheqje nga të gjitha funksionet politike dhe shtetërore. Për pesë vite me radhë, pothuajse çdo ditë, VMRO-DPMNE, udhëheqja e saj, zëdhënësit dhe mediat e afërta me ta nuk pushojnë së u marrë me mua, duke përhapur vazhdimisht gënjeshtra, shpifje dhe fyerje”, shkruan Zaev.
Ai i ka hedhur poshtë me forcë pretendimet e VMRO-DPMNE-së se ka pasur çfarëdo lidhjeje me rastin e fundit të konfiskimit të kanabisit mjekësor, për të cilin është pretenduar se ka qenë i magazinuar në mënyrë të parregullt.
“Është një gënjeshtër e paturpshme se jam i lidhur në çfarëdo mënyre me rastet e kanabisit që iu prezantuan publikut. Po aq e paturpshme dhe e pacipë është gënjeshtra se kam telefonuar në Drejtorinë Doganore”, thekson Zaev, duke shtuar se kërkon publikisht falje nga deputeti Petrushevski dhe nga VMRO-DPMNE.
Në statusin e tij, ish-kryeministri i referohet edhe, siç i quan ai, trillimeve të tjera që kjo parti i përsërit vazhdimisht – se po ndërton rrokaqiej në Dubai, se ka ushtruar presione lidhur me spitalin e Zhan Mitrevit dhe se ndërhyn në sistemin e drejtësisë.
“Të gjithë e dinë se kurrë nuk kam pasur dëshirë të padis. Kam luftuar për lirinë e shprehjes. Nuk jam hakmarrë ndaj askujt për atë që më ndodhi më 27 prill në Kuvend. Por tani mjaft më!”, porositi Zaev.
Ai paralajmëron se, nëse nuk merr një kërkimfalje brenda afatit të paraparë me ligj, do të paraqesë padi kundër Brane Petrushevskit dhe VMRO-DPMNE-së.
