Shkupi do të luajë sot ndeshjen e fundit për vitin 2025, kur do të takohet me ekipin AP Brera në raundin e 16-të të Ligës së Parë të Futbollit të Maqedonisë. Vendasit shpresojnë që fati sportiv më në fund t’u buzëqeshë në ndeshjen e fundit të këtij viti dhe të shënojnë fitoren e shumë dëshiruar.
Futbollisti i Shkupit, Xhihan Adili, thekson se skuadra punoi seriozisht dhe u përgatit sa më shumë që të ishte e mundur për sfidën e ardhshme.
“E humbëm ndeshjen e fundit kundër Brerës jo për shkak të mungesës së angazhimit, por për shkak të mungesës së fatit në momentet kyçe. Ekipi punoi shumë dhe është përgatitur maksimalisht për sfidën e radhës. Shpresojmë që këtë herë fati të jetë në anën tonë dhe të arrijmë rezultatin që kërkojmë dhe meritojmë”, tha ndër të tjera Xhihan Adili.
Në ndeshjen e parë, skuadra e AP Brera shënoi një fitore të ngushtë, falë golit të Stojanovit të shënuar pesë minuta para përfundimit të ndeshjes.
Takimi Shkupi-Brera do të luhet në stadiumin e Strugës në orën 13:00.
