Ministria e Punëve të Brendshme ka ngritur kallëzim penal kundër katër personave për vrasjen në Tetovë pak ditë më parë dhe për të gjithë është caktuar masa e paraburgimit 30 ditor. Megjithatë, nga katër të dyshuarit, dy janë në arrati. Bëhet fjalë për R.T (37 vjeç) nga Tetova, i cili u plagos në shkëmbimin e zjarrit dhe u vendos për mjekim në Shkup. Më pas kallëzime janë dorëzuar edhe kundër 15 vjeçarit nga fshati Gajre, për të cilin ka dyshime të bazuara se e ka kryer vrasjen. Për vrasje në tentativë akuzohen edhe M.T (45) dhe Z.M (37) po ashtu nga fshati Gajre. Të njëjtit dyshohen edhe për vepër penale armëmbajtje pa leje dhe vepër penale kundër sigurisë së përgjithshme.
“Më 10.08.2025 në rrugën Bllagoja Toska” në Tetovë, R.T dhe 15 vjeçari, duke përdorur pushkë automatike, i morën jetën një personi, dhe rrezikuan jetën dhe trupin e personave të tjerë, përfshirë edhe njërin prej të dyshuarve të tjerë. Me pushkët automatike, ata qëlluan disa plumba në një makinë “Golf” duke goditur tani të ndjerin, i cili ishte në vendin e shoferit. Dy predha përfunduan në gjoksin e pasagjerit, i cili pësoi lëndime të rënda trupore me rrezik konkret për jetën. Një predhë përfundoi në kofshën e djathtë të një fëmije të lindur në vitin 2012, e cila rastësisht ndodhej në afërsi”, njoftojnë nga MPB.
Siç njoftojnë më tej nga Ministria e Brendshme, edhe pse të plagosur, Z.M dhe një person tjetër nxorën armët dhe filluan të qëllojnë mbi automjetin që po largohej, duke goditur edhe një person tjetër duke e lënë me lëndime të rënda, ndërsa plumbat përfunduan edhe mbi një makine tjetër që po kalonte rastësisht. Për momentin të dyshuarit Z.M dhe M.T janë në arrati dhe po merren masa për gjetjen dhe privimin e tyre nga liria. /Alsat.mk
