Një burrë është arrestuar dhe të njëjtit i është caktuar masa e paraburgimit, pasi i njëjti dyshohet se ka vrarë një grua 79 vjeçe në fshatin Çellopek të komunës së Staro Nagoriçanit, përcjell TV21. Nga Prokuroria thonë se personi i arrestuar, 25 vjeç, dyshohet edhe për raste të tjera.
“Në një datë të pacaktuar në periudhën nga 27.01 deri më 12.02.2026, i dyshuari 25-vjeçar në fshatin Çellopek, komuna e Staro Nagoriçanit, me qëllim mizor dhe të padrejtë i ka privuar jetën viktimës, një gruaje të lindur në vitin 1947. Ai ka shfrytëzuar faktin që viktima jetonte vetëm, ishte e moshuar dhe e paaftë. Kur hyri në shtëpinë e saj, ajo po flinte në krevat, dhe i dyshuari e sulmoi fizikisht, duke i shkaktuar disa goditje që i shkaktuan lëndime të rënda trupore, nga të cilat gruaja vdiq. Me veprime të koordinuara intensive gjatë disa ditëve të fundit nga Prokuroria Publike Kumanovë dhe Qendra Hetimore pranë kësaj prokurorie, MPB-ja dhe ekipet e Institutit për Mjekësi Ligjore kanë siguruar prova që tregojnë lidhje të këtij rasti me disa raste të ngjashme në rajonin e Kumanovës. Për shkak të ngjashmërisë në zgjedhjen e viktimës dhe mënyrën mizore të kryerjes së veprës, po hetohet nëse edhe në ato raste bëhet fjalë për vrasje të kryera nga i njëjti autor. Për një nga viktimat potenciale dje është urdhëruar eks-humimi dhe obduksioni; nga trupi i gruas së ndjerë janë marrë gjurmë dhe ADN, të cilat po analizohen”, thonë nga Prokuroria, duke shtuar se është urdhëruar gjithashtu ekspertizë psikiatrike për të dyshuarin.
