Mbrëmjen e 23 janarit, policia ndaloi një Audi A8 në fshatin Volkovë. Pas kontrolleve, u konstatua se shoferi kishte mbushur 15 vjeç këtë muaj, ndërsa në automjet kishte disa armë dhe municione.
Automjeti ishte në pronësi të babait të tij 55-vjeçar, kundër të cilit është nisur procedura penale.
Siç njoftoi Prokuroria Themelore Publike e Shkupit, babai i dyshuar kishte në automjet dy pistoleta, njëra me kalibër 7,65 mm dhe tjetra me kalibër 9 mm, secila me nga katër plumba, më pas një pistoletë tjetër për të cilën kishte leje për mbajtje me tetë plumba dhe dy pistoleta sinjalizuese.
Prokuroria Themelore Publike e Shkupit ka lëshuar Urdhër për zhvillimin e procedurës hetimore kundër 55-vjeçarit të dyshuar për veprën penale – Prodhimi, mbajtja, ndërmjetësimi dhe tregtimi i paautorizuar me armë dhe lëndë shpërthyese, sipas nenit 396 paragrafi 3 lidhur me paragrafin 1 të Kodit Penal.
Si masë paraprake, prokuroria ka kërkuar nga gjykata që të vendoset ndalimi i largimit nga vendbanimi ose qëndrimi i tij, paraqitja periodike tek një person zyrtar i caktuar, si dhe t’i konfiskohen pasaporta dhe leja e drejtimit.
Gjithashtu, siç njoftoi OJQ, nga gjyqtari i procedurës paraprake është kërkuar që të ndalohet qasja e djalit të tij të mitur, të miturve të tjerë ose personave të tjerë të paautorizuar në dhomën ose shtëpinë ku ka armë zjarri.
