Teksa në Kosovë po vazhdon numërimi i votave pas zgjedhjeve të së dielës, vëmendja është zhvendosur te votat e diasporës, votat me kusht dhe ato të personave me nevoja të veçanta, të cilat pritet të jenë vendimtare për fatin politik të AAK-së, e cila është e rrezikuar për të mos e kaluar pragun zgjedhor prej 5 për qind.
Analisti politik Faton Mehmeti, në një prononcim për “Bota sot”, vlerëson se rreziku për AAK-në është real dhe serioz, sidomos nëse Lëvizja Vetëvendosje arrin të marrë një numër të madh votash nga diaspora.
“Natyrisht se AAK ka rrezik të mos e kalojë pragun, nëse VV merr rreth 70 mijë vota nga diaspora dhe nga votat me kusht dhe të personave me nevoja të veçanta. Nëse ndodh kjo, AAK do të shuhet”, shprehet Mehmeti.
Sipas tij, rënia e AAK-së nuk është e re dhe nuk lidhet vetëm me këto zgjedhje.
“Edhe pse ka shumë kohë që AAK është në rënie, edhe nëse jo në këto zgjedhje, në të tjerat s’do ta kalojë pragun. Pra, është në vdekje klinike dhe shumë shpejt do ta japë ‘shpirtin’”, vlerëson ai.
Mehmeti thekson se arsyeja kryesore e këtij rrënimi është mungesa e ofertës politike dhe humbja e besimit të votuesve.
“Kjo ngase kjo parti nuk ka çfarë t’u ofrojë votuesve, të cilët kanë parë se si kjo parti ka zhvatur shtetin derisa ishte në pushtet. Në këtë kuptim, AAK e ka të përfunduar përgjithmonë mundësinë për të qenë pjesë e qeverisë së Kosovës”, shprehet analisti.
Ai përdor një gjuhë të ashpër për të përshkruar fundin politik të AAK-së.
“Në vdekje klinike, kjo parti shumë shpejt do të ‘vdes’, me çka mbyllet kështu me turp jeta politike e saj”, thekson Mehmeti.
Në këtë kontekst, ai kërkon edhe përgjegjësi politike nga udhëheqja e partisë.
“Gjithsesi, z. Haradinaj duhet të japë dorëheqje dhe të bindet se politikisht ka dështuar. Edhe nëse kjo nuk ndodh, nuk do të jetë e gjatë jeta politike e AAK-së, e cila është në prag të falimentimit”, përfundon Mehmeti.
Sipas tij, fatin e Nismës e ka tashmë edhe AAK, duke nënvizuar se skena politike në Kosovë po hyn në një fazë të re, ku partitë e vjetra po zhduken gradualisht nga vullneti i votuesve.Bota sot
