Përfaqësuesi i VLEN-it, Arbër Kadriu, doli sot para mediave me akuza të rënda ndaj ish-ministrit të Punëve të Jashtme, aktualisht kandidat i DI-së për Komunën e Çairit, Bujar Osmani, lidhur me prokurimet për Këshillin Ministror të OSBE-së të mbajtur në dhjetor 2023.
“Ky dokument është dëshmi e pakontestueshme e mënyrës korruptive se si ka vepruar ish-ministri Bujar Osmani,” tha Kadriu, duke prezantuar kontratën për marrjen me qira të automjeteve për nevojat e MPJ-së.
Sipas tij, marrëveshja e nënshkruar kap shifrën 56.640.000 denarë për vetëm dy ditë aktivitet, pa mekanizma kontrolli dhe pa dëshmi për numrin real të automjeteve të përdorura.
Kadriu publikoi edhe çmimet që shteti ka paguar:
Automjet VIP: 29.000 denarë/ditë (pa TVSH)
Automjet i klasës së mesme: 23.000 denarë/ditë (pa TVSH)
Minivan 8+1: 19.200 denarë/ditë (pa TVSH)
“Vetëm një muaj më herët, i njëjti operator kishte kontratë me MPJ me çmim prej 9.500 denarë për të njëjtin tip automjeti. Pra, shteti ka paguar trefish më shtrenjtë për të njëjtat shërbime, nga e njëjta kompani dhe në të njëjtën periudhë. Ky është korrupsion sistematik, nuk është gabim administrativ,” theksoi ai.
Ai akuzoi se kontrata është nënshkruar pa procesverbal, pa kontroll të brendshëm dhe pa komision pranimi. “Ky është model klasik i derdhjes së parave publike në xhepa privatë. Ky ishte stili i punës së Bujar Osmanit si ministër i Jashtëm,” u shpreh Kadriu, duke theksuar se këto konstatime nuk janë të VLEN-it, por të Entit shtetëror të revizionit.
VLEN kërkon hapjen e hetimeve për të gjithë të përfshirët në kontratë dhe verifikim të plotë të të gjitha prokurimeve në MPJ gjatë mandatit të Osmanit.
“E pyesim publikisht Bujar Osmanin: Kush e ka vërtetuar numrin e automjeteve dhe realizimin e kontratës? Pse çmimet kanë qenë trefish më të larta? Kush ka përfituar nga kjo skemë? Ai nuk mund të fshihet pas nëpunësve dhe procedurave,” tha Kadriu.
Në fund, përfaqësuesi i VLEN-it deklaroi se ky model duhet të marrë fund: “VLEN do të vazhdojë të zbulojë të vërtetën dhe të luftojë për një qeverisje të ndershme, të përgjegjshme dhe transparente në menaxhimin e parave të qytetarëve.”
