Sporti është një nga shtyllat më të rëndësishme që forcon shoqërinë, dhe këtë e theksoi sot kandidati i koalicionit VLEN për kryetar të komunës së Çairit, Izet Mexhiti gjatë vizitës në klubin e Sambos në Shkup.
Gjatë takimit me Erdal Fakiç, kryetar i Federatës së Sambos dhe trajner i xhudos, Mexhiti pa nga afër përkushtimin dhe disiplinën e sportistëve që çdo ditë punojnë me zell për të ndërtuar një brez të ri kampionësh.
“Sporti ka nevojë për mbështetje të vërtetë, jo veç fjalë. Klubet si ky kanë nevojë për kushte më të mira, investime dhe ndihmë institucionale, sepse këtu lindin kampionët e së ardhmes”, u shpreh Mexhiti, duke vlerësuar lartë punën e trajnerëve dhe sportistëve.
Ai theksoi se institucionet duhet të jenë më pranë sportit dhe sportistëve, duke ofruar mbështetje reale për klubet që punojnë ndershëm dhe me rezultate konkrete.
“E vlerësoj lartë punën e këtij ekipi që, përtej vështirësive, po e mban gjallë pasionin për sportin dhe po krijon shembuj pozitivë për të rinjtë tanë. Do të jem gjithmonë në krah të atyre që punojnë me ndershmëri dhe përkushtim”, shtoi ai.
Me këtë vizitë, Mexhiti dha mesazh të qartë se sporti nuk është luks, por domosdoshmëri për zhvillimin e shëndetshëm të rinisë dhe të shoqërisë në tërësi.
