Ky kalim ilegal për këmbësorët afër Bit Pazarit vazhdon të funksionojë. Ndonëse aty nuk ka viza të bardha qytetarët qarkullojnë nga njëra anë në tjetrën.
Ura që qëndron mbi rrugë mbetet e papërdorur dhe është mbyllur plotësisht.
Për shkak mos pasjes së semaforit aty vazhdimisht kemi trafik të dendur.
“Jemi në afërsi të urës së Bit Pazarit, pra edhe pse në rrugë nuk ka vizëbardha dhe semaforë qytetarët përsëri vazhdojnë të kalojnë duke rrezikuar jetën e tyre”, raporton Fazile Halili, gazetare e TV21.
Qytetarët thonë se aty duhet të vendoset semaforë dhe të ketë vizat e bardha.
“Vizëbardha duhet të ketë por edhe semaforë të ketë, këtu është rrëmujë e madhe, dikush semaforët nuk i respekton të shkelë në semafor, shpejton edhe të shkel. Por më mirë policia… më mirë kanë kujdes, kur janë policia nuk guxojnë të kalojnë as qytetarët po as veturat”.
“Atje në Gjenevë më kanë dënuar me trotinet 60 franga se pse nuk kam shkuar ka rruga e biçikletave, dhe unë i thashë faleminderit, pse?! Po duhet të respektohet ligji. Duhet të ketë semafor dhe vizëbardha por ne jemi një popull që e sheh ura është aty duhet të kalohet mbi urë që të mos e rrezikosh jetën. Por nuk përdorët! Shteti duhet të vendosë semafor që të kalojë plaku”
“Nëse veçmë është shteg i hapur, duhet të ketë ose semaforë ose vizëbardha, domethënë këtu nuk ka as vizëbardha të shënuara, shumë qytetarë këtu kalojnë ndodhin shumë gjëra të këqija.
Megjithatë një pakujdes i vogël vjen deri të katastrofa. Çdo ditë po ndodh ajo, përsëri do të them së paku zebra edhe nëse ndodh diçka nuk ka bazë ligjore që dikush të mbrohet ose të sulmohet ndonjë, pa dallim”
Edhe kryetari i komunës së Çairit, Izet Mexhiti, zgjidhjen e sheh me semaforë, ndërsa thotë se ura do të prishet.
“Zgjidhja e cila është përfundimtare është prishja e urës që fatmirësisht komuna e Çairit nuk ka dhënë asnjë denarë për ndërtimin e urës sepse e ka bërë me këmbim apo me hapësirën e reklamave.
-Do të prishet ura? Ka mbaruar kontrata me ndërmarrjen, nuk ka asnjë obligim Çairi, mendoj se zgjidhja më e mirë është prishja e urës dhe vendkalimi të jetë zyrtar me semaforë”, u shpreh Izet Mexhiti, kryetar i komunës së Çairit.
Pyetëm edhe në Qytetin e Shkupit, nga ku po presim përgjigje se kur do të merren masa për këtë problematikë të bulevardit Kërste Petkov Misirkov.
