Vendimi për spitalin modular do të shpallet të premten, më 16 maj, në orën 12:00. Ndërkohë, sot në Gjykatën Themelore të Tetovës u mbajt seanca përmbyllëse, ku u dhanë fjalët përfundimtare nga dy të akuzuarit dhe përfaqësuesi juridik i spitalit modular.
Avokatët e Florim Besimit dhe Artan Etemit kërkuan që klientët e tyre të përjashtohen nga aktakuza, duke argumentuar se ata nuk mbajnë asnjë përgjegjësi për sistemin kundër zjarrit në spital. Nga ana tjetër, përfaqësuesit ligjorë të familjarëve të viktimave kërkuan që spitali i Tetovës të shpallet fajtor dhe familjarëve t’u njihet e drejta për dëmshpërblim, duke theksuar se ata janë ndier të anashkaluar gjatë gjithë procesit gjyqësor dhe pas tragjedisë.
Pas përfundimit të seancës, familjarët shprehën pakënaqësinë e tyre me rrjedhën e gjykimit, duke thënë se e vërteta për shkaktarët e zjarrit ende nuk ka dalë në dritë.
Në gjykimin e parë dy drejtorët e spitalit klinik të Tetovës u dënuan me nga një vit e gjashtë muaj burg me kusht, ndërsa subjekti u dënua me një milion denarë. Nga akuza u lirua mjeku që ishte përgjegjës për qendrën e Kovidit, Boban Vuçevski. Në 8 shtator të vitit 2021 nga zjarri që shkrumboi Spitalin Modular të Tetovës humbën jetën 14 pacientë dhe familjarë të tyre të cilët ndodhën brenda objektit për t’u kujdesur për të afërmit e tyre. Prej vitesh familjarët kërkojnë drejtësi.
