Lenny Wilkens, njëri prej trajnerëve më të trofeshëm në histori të NBA-së dhe dy herë “Basketball Hall-of-Famer” ka vdekur në moshën 88-vjeçare.
Wilkens vdiq paqësisht në shtëpinë e tij në Washington të dielën, njoftoi familja e tij, shkruan “Daily Mail”, përcjell “Gazeta Express”.
I lindur në Brooklyn, New York, Wilkens ishte lojtari yll i kolegjit Providence para se ta shijonte basketbollin profesionist duke luajtur me St. Louis Hawks, Seattle SuperSonics, Cleveland Cavaliers dhe Portland Trail Blazers.
Wilkens do ta niste më pas një karrierë të suksesshme si trajner mes periudhës 1969-2005 duke e përfshirë titullin e kampionit të NBA-së në vitin 1979 me Sonics.
Ai ende e mban epitetin e trajnerit të tretë më të suksesshëm të të gjitha kohëve në NBA, prapa Don Nelson e Gregg Popovich.
Wilkens është po ashtu trajneri më jetëgjatë në histori të NBA-së, duke i drejtuar ekipet në 2,487 ndeshje, më së shumti nga të gjithë në këtë ligë.
I lindur në Bedford-Stuyvesant, vend komshi me Brooklyn, Wilkens u shkollua në “Boys High School”.
Pas një eksperience me Providence Friars, ai u draftua si lojtari i gjashtë i pëlqyer nga Hawks, e cila luante në St. Louis në atë kohë.
Wilkens e kaloi pjesën më të madhe të karrierës në Seattle, ndërsa u shkëmbye me Walt Hazzard para vitit 1968.
Pas katër vjetësh me SuperSonics, ai i luajti vetëm edhe tri sezone të tjerë në NBA, dy me Cavaliers dhe një me Trail Blazers.
Në karrierën e tij si lojtar, Wilkens ishte nëntë herë pjesë e NBA All-Star – duke e fituar edhe çmimin MVP i kësaj gare në vitin 1971.
Ai ishte po ashtu lider i asistimeve në vitin 1970.
Gjatë periudhës në Seattle, Wilkens shërbeu si lojtar-trajner nga viti 1969 deri më 1972.
Ai e bëri të njëjtën gjë edhe me Tail Blazers para se të pensionohej përfundimisht nga basketbolli i luajtur në vitin 1975.
