Gjykimi për zjarrin në diskoteken Pulse në Koçan, ku humbën jetën 63 persona dhe u plagosën mbi 200 të tjerë, do të vazhdojë sot në gjykatën e Idrizovës me dëgjimin e dëshmitarëve të propozuar nga Prokuroria Publike, transmeton Portalb.mk.
Prokuroria ka propozuar tre dëshmitarë për sot – Dragi Ilievski, Dejan Rashkov dhe Violeta Georgievska – të gjithë nga komuna e Koçanit.
Mbrojtja e të pandehurve do të duhet të deklarojë sot nëse e pranon tërheqjen e disa prej dëshmitarëve të propozuar nga Prokuroria, pasi Prokuroria, në seancën paraprake, u dorëzoi të gjithë të pandehurve në rastin Puls një listë dëshmitarësh të cilët propozon t’i tërheqë nga procedura sepse rrethanat u vërtetuan përmes dëshmive të dëshmitarëve të tjerë.
Në seancën e fundit u dëgjua dëshmitari Zhivko Stavrevski, ndihmës inspektor i përgjithshëm në Drejtorinë për Mbrojtje dhe Shpëtim (DMSh), i cili deklaroi se deri në vitin 2020, inspektimet e rregullta nuk ishin planifikuar në komunat që nuk kanë inspektorë, ndërsa Koçani nuk ishte i mbuluar nga inspektor për kontrolle dhe parandalim.
Zjarri në diskoteken “Pulse” në Koçan shpërtheu më 16 mars 2025 gjatë një shfaqjeje nga grupi DNA dhe është një nga tragjeditë më të këqija në historinë e kohëve të fundit të vendit. 63 persona vdiqën dhe mbi 200 u plagosën.
Gjyqi drejtohet nga Diana Gruevska Ilievska, ndërsa prokuroria përfaqësohet nga një ekip prej 15 prokurorësh publikë.
