Papa Françesku u varros në Bazilikën e Santa Maria Maggiore në Romë, shkruan Insajderi.
Ceremonia mortore nisi në orën 13:00 me orën lokale dhe u udhëhoq nga Kardinali Kevin Farrell, i ngarkuar me përgatitjet për funeralin dhe që do të luajë rol kyç në organizimin e konklavit për zgjedhjen e pasardhësit të Papës Françesku. Vatikani bëri të ditur se ceremonia përfundoi në orën 13:30.
Më herët gjatë ditës, mbi 250,000 besimtarë, figura fetare dhe politike u mblodhën në Sheshin e Shën Pjetrit për t’i dhënë lamtumirën Papës Françesku, i cili ndërroi jetë këtë javë në moshën 88-vjeçare.
Shërbesa përkujtimore nisi në Bazilikën e Shën Pjetrit pak pas orës 10:00 dhe zgjati rreth dy orë. Ceremonia, e udhëhequr nga Kardinali Giovanni Battista Re, një prej figurave më të larta të Kishës Katolike, përfshiu rituale, himne fetare, një predikim emocional dhe një lamtumirë të fundit për Papën, i cili ishte Papa i parë latino-amerikan në histori.
