Mbrëmja e sotme në spektaklin “Big Brother VIP Kosova” do të ketë një ndryshim në panelin e opinionistëve. Për shkak të angazhimeve profesionale jashtë vendit, këngëtarja e mirënjohur Leonora Jakupi nuk do të mund të jetë e pranishme në studio. Ajo aktualisht ndodhet në Shtetet e Bashkuara të Amerikës, ku po mban një seri koncertesh për fansat e saj atje.
Vendi i Leonorës për këtë “Prime” do t’i besohet sërish dizajnerit të njohur Valdrin Sahiti. Përmes një postimi në rrjetet sociale, Sahiti ka konfirmuar praninë e tij sonte, duke publikuar një foto nga shtrati me mbishkrimin: “Ju shoh sonte në Big Brother VIP Kosova, nashta ju bjen shpirti n’paqe”. Ky mesazh ka nxitur kureshtje te ndjekësit për komentet dhe analizat që ai do të ofrojë gjatë mbrëmjes.
Ky nuk është rasti i parë që Valdrin Sahiti ulet në karrigen e opinionistit gjatë këtij sezoni.
Ai edhe në një rast më parë ka zëvendësuar Leonorën kur ajo ka pasur pamundësi pjesëmarrjeje, duke u shndërruar tashmë në një “zëvendësues zyrtar” që mirëpritet mjaft mirë nga publiku për shkak të stilit të tij të drejtpërdrejtë.
