Në organizim të Organizatës së Veteranëve të Luftës së UÇK-së, sot në ora 13:00, në Sheshin “Skënderbeu”në Shkup, do të mbahet protesta gjithëkombëtare me moton “Unë Jam UÇK”.
Ky tubim vjen si reagim ndaj zhvillimeve të fundit politike dhe gjyqësore që lidhen me ish-pjesëtarët e Ushtrisë Çlirimtare të Kosovës, ndërsa organizatorët thonë se protesta ka për synim mbështetje morale mbarëkombëtare përudhëheqësit e UÇK-së të cilët po përballen me akuza për krime lufte dhe pengim të drejtësisë në Dhomat e Specializuara të Kosovës në Hagë. Në shesh pritet pjesëmarrje masive nga qytetarë, aktivistë, organizata dhe përfaqësues nga trevat shqiptare.
Protesta në Shkup është e pesta me radhë që po organizohet nga OVL-UÇK, pas atyre që u mbajtën në Prishtinë, Hagë, Tiranë dhe Strasburg, ku dhjetëra mijëra shqiptarë nga të gjitha trojet protestuan kundër Speciales.
Që nga 5 nëntori i 2020-së, në qendrën e paraburgimit në Hagë ndodhen katër ish-krerë të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – të akuzuar nga Dhomat e Specializuara për krime të pretenduara lufte dhe kundër njerëzimit.
