Ministria e Financave, me përkrahjen e SHBA-së, përmes Thesarit të SHBA-së dhe Zyra e Ndihmës Teknike – OTA, punon për përforcimin e kapaciteteve dhe krijimin e sistemit modern dhe të fuqishëm të financave publike. Sot u prezantuan aktivitetet e zbatuara dhe të planifikuara në ngjarjen me temë “Përforcimi i kapaciteteve institucionale: Shënimi i bashkëpunimit midis SHBA-së dhe Maqedonisë së Veriut”. Në këtë ngjarje morën pjesë ministrja e Financave, Gordana Dimitrieska-Koçoska, zëvendëskryeministri i Sistemit, Politik Ljupço Dimovski dhe ambasadorja e SHBA-së në vend, Angela Aggeler.
“Sot jemi mbledhur për të shënuar dhe vënë në pah një nga partneritetet ndërkombëtare më domethënëse dhe të qëndrueshme që përkrahin vendin tonë në përmirësimin e financave publike, respektivisht bashkëpunimin midis Ministrisë së Financave dhe Thesarit të SHBA-së, përmes Zyrës së tyre të Ndihmës Teknike (US Treasury – OTA). Ky partneritet nuk është thjesht përkrahje, por një proces afatgjatë i forcimit të institucioneve, rritjes së ekspertizës dhe krijimit të sistemeve moderne që do të sigurojnë financa publike të parashikueshme, të përgjegjshme dhe transparente”, theksoi ministrja.
Ajo falënderoi për përkrahjen e ofruar dhe theksoi se partneriteti midis Maqedonisë dhe SHBA-së në fushën e financave publike nuk është bashkëpunim administrativ, por investim afatgjatë të standardeve, integritet institucional dhe transparencë. Ajo nënvizoi se programet kontribuojnë drejtpërdrejt në institucione më efikase, menaxhim më të mirë të burimeve, ulje të risqeve dhe mbrojtje më të madhe të qytetarëve.
Zëvendëskryeministri Dimovski gjithashtu theksoi rëndësinë e përkrahjes që vendi ka marrë gjatë viteve të fundit dhe theksoi se ndihma teknike përmes Thesarit të SHBA-së është thelbësore për modernizimin e sistemit tonë në menaxhimin e financave publike dhe mundëson efikasitet më të mirë, transparencë më të madhe, llogaridhënie më të mirë, si dhe vendosje të standardeve evropiane dhe ndërkombëtare që janë të nevojshme për stabilitet fiskal afatgjatë.
Ajo vlerësoi se këto nuk janë vetëm procese teknike dhe administrative, por janë reforma themelore që ndikojnë në besimin e qytetarëve dhe investitorëve, si dhe në aftësinë tonë për krijimin e një ekonomie të qëndrueshme dhe stabile.
“Vendi ynë po përballet me plot sfida, por edhe me mundësi. Për të arritur qëllimet tona nacionale, nevojiten institucione të fuqishme, politika të qarta dhe partneritete strategjike. SHBA-ja është një nga ata partnerë që vazhdimisht na përkrahin dhe na ndihmojnë ta përshpejtojmë progresin tonë”, theksoi zëvendëskryeministri Dimovski.
Ambasadorja e SHBA-së theksoi se ky është programi i dytë më i madh në këtë drejtim i Ministrisë së Financave të SHBA-së në nivel global dhe se është i fokusuar në pesë fusha kryesore, përkatësisht në menaxhimin e financave publike, financimin e borxhit publik dhe infrastrukturës, punën bankare dhe shërbimet financiare, llogaridhënien buxhetore dhe luftën kundër krimit ekonomik.
“Suksesi i këtij partneriteti është dëshmi e angazhimit tonë të përbashkët dhe atmosferës së hapur dhe të bazuar në aspektin partnerial nga Ministria e Financave. Krijojmë institucione më të fuqishme, menaxhim fiskal më të zgjuar dhe rregulla më të qarta dhe më të drejta që u japin bizneseve dhe investitorëve siguri për zgjerimin e kapaciteteve të tyre. Reformat do të kontribuojnë në diversifikimin e burimeve të financimit, zhvillimin e tregjeve të kapitalit dhe uljen e varësisë nga huamarrja e jashtme. Çdo aktivitet ka ndikim të drejtpërdrejtë në jetën e bizneseve dhe qytetarëve në Maqedoninë e Veriut dhe Shtetet e Bashkuara të Amerikës”, theksoi Aggeler.
Aktivitetet u zbatuan në sektorët e Thesarit, Buxhetit dhe Fondeve, Sistemit Financiar dhe në fushën e tatimeve dhe sistemit doganor. Qëllimi është përmirësimi i strukturës së buxhetit me transparencë më të madhe, forcimi i mbikëqyrjes së institucioneve financiare jobankare, forcimi i menaxhimit të borxhit publik dhe përmirësimi i tregjeve të letrave shtetërore me vlerë dhe tregjeve të kapitalit, si dhe përmirësimi i sistemeve të TI-së dhe sigurisë kibernetike në Drejtorinë e të Ardhurave Publike dhe Drejtorinë Doganore.
