Presidenti Donald Trump ka deklaruar se nuk i intereson më se çfarë do të bëjnë aleatët, për të asistuar Shtetet e Bashkuara në luftën ndaj Iranit.
“Nuk më intereson, mund të bëjnë ç’të duan. Aleatët besnikë janë përfshirë tashmë”, ka thënë Trump për rrjetin informativ amerikan CBS.
I pyetur lidhur me nismën e qeverisë britanike për të dërguar luftanije në Lindjen e Mesme, presidenti amerikan ka theksuar se nuk është më e nevojshme.
“Është pak vonë për të dërguar anije tani, apo jo? Është pak vonë”, ka thënë ai.
Më tej, Trump ka hedhur poshtë kërcënimet nga shefi i institucioneve iraniane të sigurisë, Ali Larijani, i cili kishte postuar në rrjetet sociale mesazhin se Uashingtoni duhet të paguajë çmimin për sulmet ndaj Iranit.
“Nuk e kam idenë se kush është ky njeri, apo se për çfarë flet. Nuk më intereson fare. Ai është një njeri i mposhtur”, ka thënë Trump.
Presidenti ka shprehur edhe besimin e tij tek strategjia amerikane në këtë luftë dhe tek politikat e administratës së tij për Lindjen e Mesme.
“Është e pabesueshme ajo që kemi bërë. Raketat e tyre janë bërë copash, fabrikat po hidhen në erë teksa flasim dhe marina e tyre është në fund të detit. Kemi 42 anije të asgjësuara në 6 ditë. Marina e tyre ka marrë fund dhe po ashtu forcat ajrore”, ka vijuar Trump.
Duke nënvizuar se edhe lidershipi iranian është asgjësuar, kreu i shtetit ka shtuar se SHBA po fitojnë me shpejtësi në nivele të paregjistruara më parë.
