Presidenti i SHBA-së, Donald Trump, njoftoi të shtunën vendimin e tij për të rritur tarifën që kishte vendosur më parë për importet nga e gjithë bota nga 10% në 15%, ndërsa vazhdon të kundërshtojë një vendim të Gjykatës Supreme që rrëzoi taksat e tij të mëparshme të importit
Në një postim në platformën Truth Social, presidenti amerikan sqaroi se vendimi për rritjen e tarifës prej 15% erdhi pas “shumë muajsh reflektimi”.
Tarifat do të hyjnë në fuqi të martën , më 24 shkurt dhe mund të qëndrojnë në fuqi vetëm për rreth pesë muaj përpara se administrata të kërkojë miratimin e Kongresit.
Sipas tij, tarifa globale prej 10% ndaj vendeve që, siç u shpreh, “kanë përfituar nga Shtetet e Bashkuara për dekada”, do të rritet në 15%, duke e konsideruar këtë si nivelin maksimal të lejuar nga kuadri ligjor.
Trump paralajmëroi gjithashtu se në muajt në vijim administrata e tij do të përcaktojë dhe shpallë tarifa të reja, në përputhje me ligjin, me synimin për të vazhduar, sipas tij, procesin “jashtëzakonisht të suksesshëm” për ta bërë Amerikën “më të madhe se kurrë më parë”.
Njoftimi pritet të shkaktojë reagime të forta në tregjet ndërkombëtare dhe në radhët e partnerëve tregtarë të Shteteve të Bashkuara.
“Bazuar në një rishikim të thelluar, të detajuar dhe të plotë të vendimit qesharak, të shkruar keq dhe jashtëzakonisht anti-amerikan mbi tarifat, të shpallur dje nga Gjykata e Lartë e Shteteve të Bashkuara, pas SHUMË muajsh reflektimi, unë, si President i Shteteve të Bashkuara të Amerikës, do të rris, me efekt të menjëhershëm, tarifën globale 10% ndaj vendeve, shumë prej të cilave kanë ‘përfituar’ nga Shtetet e Bashkuara për dekada të tëra, pa pasoja (derisa erdha unë!), në nivelin plotësisht të lejuar dhe të verifikuar ligjërisht prej 15%.
Gjatë muajve të ardhshëm, administrata Trump do të përcaktojë dhe do të shpallë tarifat e reja, të lejuara ligjërisht, për ta bërë Amerikën sërish madhështore. MË TË MADHE SE KURRË MË PARË!!!
Faleminderit për vëmendjen tuaj ndaj kësaj çështjeje.
Presidenti DONALD TRUMP”, shkruan Trump në Truth Social.
