Brenda dy javësh, partnerët dhe aleatët do të dinë nëse mund të arrihet paqja në Ukrainë. Kështu ka deklaruar presidenti i Shteteve të Bashkuara, Donald Trump, në emisionin “Todd Starnes Show”.
Duke iu përgjigjur një pyetjeje nëse mund të arrihet paqe në rajon, Trump tha: “Unë do të thosha se brenda dy javësh do ta dimë, në një mënyrë apo në një tjetër.”
Ai shtoi se, nëse nuk është e mundur të zgjidhet lufta e Rusisë kundër Ukrainës, atëherë mund të jetë e nevojshme të “ndërmerret një qasje tjetër”.
Lideri amerikan theksoi se gjithçka do të bëhet e qartë së shpejti.
Takimi mes Zelenskyt dhe Putinit
Më 15 gusht, presidenti amerikan Donald Trump u takua me liderin rus Vladimir Putin në Alaskë. Më 18 gusht, Trump zhvilloi bisedime në Shtëpinë e Bardhë me presidentin ukrainas Volodymyr Zelensky dhe liderët evropianë.
Pas këtyre takimeve, presidenti amerikan telefonoi Putinin për të diskutuar mundësinë e negociatave me Zelenskyn. Moska ngul këmbë që të zhvillohet fillimisht një takim dypalësh me presidentin ukrainas, e më pas një format trepalësh që do të përfshinte edhe Trumpin.
Zvicra ka ofruar të jetë vendi pritës në samitin e ardhshëm, ndërsa edhe Austria ka bërë një propozim të ngjashëm.
Ndërkohë, kancelari gjerman Friedrich Merz shprehu dyshime nëse Putin do të guxojë të takohet personalisht me Zelenskyn./tvklan
