Pasi iu nënshtrua kontrollit të parë mjekësor që nga rikthimi në Shtëpinë e Bardhë, Presidenti i Shteteve të Bashkuara, Donald Trump, tha se ndihet “në formë shumë të mirë”.
Ai iu nënshtrua kontrolleve kardiake, si dhe atyre për shëndetin mendor, në Qendrën Mjekësore “Walter Reed” në periferi të Uashingtonit.
Kreu i Shtëpisë së Bardhë u tha gazetarëve në avionin presidencial se “u përgjigj saktë në çdo pyetje” në testin për shëndetin mendor dhe shtoi se jo vetëm që ka zemër të mirë, por ka gjithashtu edhe “shpirt shumë të mirë”.
Ai theksoi se raporti pritet të publikohet më 13 prill.
Presidentët amerikanë e kanë zakon të japin hollësi për shëndetin dhe mirëqenien e tyre, megjithëse nuk janë të detyruar ta bëjnë këtë.
Donald Trump është akuzuar vazhdimisht për mungesë transparence në lidhje me shëndetin e tij, por Shtëpia e Bardhë tha se mjeku presidencial, Sean Barbabella, do të japë një përmbledhje të ekzaminimit dhe se “natyrisht” kjo do të bëhet publike.
Presidenti amerikan, një adhurues i madh i golfit, i cili nuk pi alkool apo cigare, është krenuar vazhdimisht për energjinë e tij që nga fillimi i mandatit të dytë. Megjithatë, është e njohur se ushqimi i shpejtë është dobësia e tij.
Ekzaminimet e bëra gjatë mandatit të parë treguan se Trump po merrte ilaçe për të trajtuar kolesterolin e lartë.
