“Në takimin e fundit që u mbajt dje në Ministri, ku morën pjesë mbi 30 shoqata bujqësore dhe bujq, u shpreh mbështetje për reformat e nisura në fushën e subvencionimit. Të pranishmit përshëndetën drejtimin e ndryshimeve, duke theksuar se për herë të parë bujqit e vërtetë dhe aktivë vendosen në qendër të prioriteteve,” theksoi ministri i Bujqësisë, Pylltarisë dhe Ekonomisë së Ujërave, Cvetan Tripunovski gjatë pjesëmarrjes së tij në emisionin “Lider”.
Ministri theksoi se praktika deri më tani kishte lejuar keqpërdorime, duke dhënë shembuj me vreshta që formalishisht mirëmbaheshin, por pa prodhim real, si dhe pemishte në rajonin e Resnjës ku nuk kryhej punë reale bujqësore, por aplikohej dhe merreshin subvencione. Reformat synojnë të krijojnë një sistem të drejtë dhe të barabartë, ku mbështetja do t’u jepet atyre që vërtet prodhojnë.
Ai shtoi se sa i përket përdoruesve të mëdhenj, kombinateve dhe ekonomive me sipërfaqe më të mëdha, fitimprurja tek ata është e ndryshme krahasuar me prodhuesit e vegjël, por edhe aty ekzistojnë kritere të qarta të përcaktuara.
Ministri theksoi se në vitet e para të futjes së subvencioneve kishte pasur efekte pozitive dhe rritje të prodhimit, por gjatë 7–10 viteve të fundit është shënuar një rënie serioze në prodhimin e ushqimit.
“Brenda grupit punues, ku marr pjesë personalisht, është përgatitur një analizë e detajuar për të pasur një pasqyrë të qartë dhe për të vendosur bazën për reformat, me qëllim përshtatjen e bujqve për periudhën strategjike të re 2028–2035,” sqaroi ministri.
Ai shtoi se gjatë viteve 2026 dhe 2027 bujqit gradualisht do të përgatiten për drejtimin e ri të mbështetjes shtetërore në sektor, me qëllim që kushtet natyrore që ka vendi dielli, uji dhe toka e cilësisë së lartë të japin rezultate të nevojshme për vendin.
