Ministri i Bujqësisë, Pylltarisë dhe Ekonomisë së Ujërave, Cvetan Tripunovski, në panel-diskutimin e sotëm “Rritja e ekonomisë – siguri ekonomike për qytetarët”, foli për gjendjen në sektorin e bujqësisë.
Tripunovski theksoi se bujqësia në vitet e kaluara, sipas të dhënave me të cilat disponon Ministria, kishte shënuar trend negativ, veçanërisht në aspektin e sasisë së prodhimit dhe eksportit të produkteve bujqësore.
“Nëse i krahasojmë shifrat e vitit 2025 me vitin 2024 dhe vitet paraprake, mund të vërejmë një rritje serioze në industrinë përpunuese prej 3,6%. Ajo që është edhe më e rëndësishme është analiza sipas tremujorëve në vitin 2025, veçanërisht në pjesën e grumbullimit dhe shitjes së produkteve bujqësore, që paraqet një nga treguesit më relevantë për sasinë e prodhimit vendor”, theksoi Tripunovski.
“Në tremujorin e katërt të vitit 2025, grumbullimi dhe shitja e produkteve bujqësore arrijnë rreth 12,5 miliardë denarë, që është 15% më shumë krahasuar me vitin 2024. Trend i ngjashëm pozitiv është vërejtur edhe në tremujorët e tjerë, që do të thotë se prodhimi vendor nga aspekti sasior shënon rritje”, sqaroi ministri.
Ai shtoi se viti ka qenë i suksesshëm pavarësisht kushteve të pafavorshme klimatike.
“Nëse e analizojmë gjithë vitin në tërësi, jo vetëm në pjesën e grumbullimit dhe shitjes, por edhe në eksportin e produkteve bujqësore, shënojmë rritje prej rreth 5,5% krahasuar me vitin 2024. Ky është një tregues i qartë se prodhimi bujqësor po lëviz në drejtim pozitiv dhe se po e rrisim prodhimin e ushqimit”, theksoi Tripunovski.
Ministri theksoi se këto rezultate janë rezultat i politikave të mira të Qeverisë, krijimit të masave intervenuese, stabilizimit të sektorit dhe pagesës së detyrimeve të prapambetura.
