Një i burgosur 54-vjeçar dje ka ndërruar jetë në burgun hetues të Shutkës. Atij paraprakisht shërbimet e burgut nuk i kishin mundësuar trajtim në spital, edhe pse kishte dokumentacion mjekësor që vuante nga disa sëmundje serioze dhe prej disa kohësh kishte pësuar edhe goditje në tru, akuzojnë të afërmit e tij. Asmir Alispahiç, i cili është i afërm i të ndjerit, e bëri publik rastin në opinion, duke akuzuar se megjithëse i burgosuri kishte edhe vendim nga gjykata që duhet të trajtohej në spital, megjithatë, Drejtoria për Zbatimin e Sanksioneve nuk ka vepruar sipas ligjit dhe personi në fund ka ndërruar jetë.
“E dimë se nëse ka nevojë për trajtim, kjo zgjidhet për një kohë shumë të shkurtër – me shoqërim, me ndihmë të shpejtë, me mbajtje në klinikë, me dhënie të ndihmës mjekësore. Në atë pjesë mendoj se qëndron neglizhenca. Kjo i referohet Drejtorisë për Ekzekutimin e Sanksioneve. Po ashtu, sipas informacioneve që i kam, për çdo kërkesë nga drejtoria, gjykata ka dhënë në kohë miratim, me shkrim apo me gojë. Pa marrë parasysh në cilën fazë të procedurës – gjyqtari i procedurës paraprake, gjyqtari për vlerësim të aktakuzës apo gjyqtari gjykues” tha Asmir Alispahiç, i afërm i personit të ndjerë.
Sipas Alispahiçit, personi kishte dokumentacion me të cilin vërtetohej se vuante nga tumori edhe para se të pësonte goditjen në tru. Rastin e të burgosurit të ndjerë e konfirmoi edhe policia.
“Më 30.8.2025, rreth orës 15:30, në SPB Shkup nga një i punësuar në burgun e Shuto Orizarës është raportuar se M.P. (54) nga Konjarja e Poshtme, i cili ishte në paraburgim, kishte kërkuar ndihmë mjekësore. Nga ana e mjekut të ndihmës së shpejtë, në orën 15:58 është konstatuar vdekja pa shenja dhune”, thonë nga MPB.
Përgjigje pse personi nuk ishte dërguar në spital kërkuam edhe nga Drejtoria për Zbatimit e Sanksioneve, por nuk na u përgjigjën. Përndryshe, 54-vjeçari prej pesë muajsh gjendej në repartin e paraburgimit në burgun e Shuto Orizarës, ndërsa avokati i tij, Goran Vasilevski, për një periudhë të gjatë kishte paralajmëruar se personit i nevojitej ndihmë mjekësore.
I ndjeri ishte i akuzuar për veprat “Bashkim kriminal” dhe “marrje shpërblimi për ndikim të kundërligjshëm”, e kjo në lidhje me abuzimet me pensionet për personat me aftësi të kufizuara. Në këtë rast ka aktakuzë ndaj 49 personave, të cilët dyshohet se merrnin ryshfet nga persona të tretë për të përgatitur dokumentacion mjekësor të rremë, në mënyrë që ata të mund të përfitonin pension invalidor. /Alsat.mk
