Një aksident tragjik ajror ka ndodhur mëngjesin e së enjtes në Karolinën e Veriut, ku një avion privat u rrëzua gjatë uljes në një aeroport lokal, duke shkaktuar vdekjen e gjashtë personave. Mes viktimave është edhe ish-piloti i njohur i NASCAR, Greg Biffle.
Sipas burimeve të shumta, në bord të avionit ndodheshin Greg Biffle, bashkëshortja e tij Cristina, vajza Emma dhe djali Ryder. Lajmi u konfirmua nga Lawrence Mitchell, i njohur si YouTuber-i Cleetus McFarland, i cili reagoi përmes një postimi prekës në rrjetet sociale pasditen e së enjtes.
“Jemi të shkatërruar. Më vjen shumë keq që duhet ta ndaj këtë lajm,” shkruante Mitchell në reagimin e tij. Ai dhe Biffle kishin një miqësi të ngushtë dhe bashkëpunonin shpesh në aktivitete garash dhe iniciativa bamirësie.
Dyshja kishte qenë së fundmi e angazhuar edhe në dërgimin e ndihmave për viktimat e uraganit Helene, pasojat e të cilit shkaktuan dëme të mëdha dhe humbje jete në rajon.
Vdekja e Greg Biffle dhe familjes së tij u konfirmua gjithashtu nga kongresmeni Richard Hudson, përfaqësues i distriktit të 9-të të Karolinës së Veriut, i cili shprehu ngushëllimet për familjarët dhe komunitetin e motorsporteve.
Autoritetet kanë nisur hetimet për të zbardhur shkaqet e rrëzimit të avionit, ndërsa bota e sportit dhe fansat e NASCAR-it kanë reaguar me dhimbje të thellë për humbjen e një figure të njohur të garave automobilistike.
