Inspektorët e trafikut rrugor pranë Inspektoratit Shtetëror të Transportit kanë kryer 138 kontrolle gjatë tre ditëve të fundit, ku janë konstatuar parregullsi tek 21 persona juridikë dhe fizikë. Ministria e Transportit njoftoi se shkelësve u janë shqiptuar gjoba përkatëse.
Kontrollet inspektuese janë kryer në përputhje me Planin e Veprimit të Inspektoratit, dhe për parregullsitë e konstatuara do të informohen edhe Ministria e Punëve të Brendshme dhe Prokuroria Publike për veprim të mëtejshëm.
Inspektorati ka publikuar emrat e 11 subjekteve juridike ku janë konstatuar parregullsi dhe të cilët janë gjobitur. Bëhet fjalë për:
“Durmo Turs” nga Gostivari,
“Deni International” nga Ilindeni,
“Swiss Mak Aligega” nga Gostivari,
“Zem Promet – Kompani” nga Saraji,
“Slovin Biljana” nga Ohri,
“Bis” nga Ohri,
“Peshter” SHPK nga Çairi,
“Dimitrioski” nga Gazi Baba,
“Hisari-GD” nga Dibra,
“Inkom Biznis” nga Kumanova,
“Palas Export-Import” nga Gostivari.
Përveç këtyre 11 subjekteve juridike, janë konstatuar parregullsi edhe tek 10 persona fizikë që ushtrojnë aktivitetin e transportit të pasagjerëve dhe mallrave.
Ministria e Transportit – Inspektorati Shtetëror i Transportit njofton se, në përputhje me Planin e Veprimit të miratuar për inspektime të transportit të pasagjerëve dhe mallrave, duke filluar nga nesër inspektorët do të kryejnë kontrolle të përditshme intensive mbi transportin e pasagjerëve dhe mallrave, kontrollin e dokumenteve (licencat, ekstraktet e licencave, lejet, certifikatat e kompetencës profesionale të shoferëve, tahografët), mbikëqyrjen e sigurisë në trafik dhe parandalimin e transportit të paligjshëm.
