As Dejan Jovanov – Deko si i akuzuari kryesor dhe as 34 personat e tjerë fizikë të akuzuar, nuk ndjejnë faj për zjarrin në diskotekën Puls në Koçan. Para gjykatës sot fajësinë e mohuan edhe përfaqësuesit e tre personave juridikë të përfshirë në aktakuzë. Jovanovski në fjalimin e tij hyrës tha se nuk ishte i vetëdijshëm që klubi punonte me një sërë mangësish në aspektin e sigurisë dhe se të gjithë ata që e njohin e dinë që ai kujdesej për sigurinë e të pranishmëve në Puls.
Gjatë fjalimit të tij, një pjesë e prindërve të viktimave e braktisën sallën e gjykatës. Avokatja e Jovanovit, nga ana tjetër tha se pronari i objektit nuk e dinte se grupi DNK gjatë performancës do të aktivizonte fishekzjarre. Po ashtu, sipas mbrojtjes, Jovanov nuk ishte i vetëdijshëm se objekti i tij nuk përmbushte kushtet për mbrojtje dhe shpëtim në rast zjarri. Ajo e drejtoi gishtin kah institucionet që nuk konstatuan mangësi dhe tha se Jovanovi mund të përgjigjet vetëm për shkak të pakujdesisë.
“Mbrojtja do të dëshmojë se kjo është pasojë direkte e punës joprofesionale të inspektorateve dhe shërbimeve kompetente, të cilat gjatë gjithë periudhës nga hapja e këtij klubi deri në momentin kritik, asnjë nga inspektoratet dhe shërbimet kompetente në vend, që kishin njohuri faktike për funksionimin e kësaj kabareje, asnjëherë nuk i kanë evidentuar mangësitë. Vetëm mund të përmendet ekzistenca e një gabimi të krijuar për shkak të pakujdesisë”, tha Ivana Kocevska, Avokate e të akuzuarit kryesor.
Seanca vazhdoi me fjalët hyrëse të mbrojtjes së disa të akuzuarve të tjerë, të cilët gjithashtu para gjykatës u zotuan që gjatë pjesës tjetër të procedurës do të vërtetojnë pafajësinë e klientëve të tyre. Seanca e radhës është caktuar për më 4 dhjetor, kur mbrojtja do të vazhdojë me fjalët hyrëse. Si pasojë e zjarrit në Koçan më 16 mars, 63 persona humbën jetën dhe mbi 200 të tjerë u lënduan. /Alsat.mk
