“Nuk kemi asgjë të përbashkët me BDI-në”, ishte përgjigjja e Arben Taravarit në “Click Plus” ndaj thirrjes së BDI-së për t’iu bashkuar bashkëveprimit të mëtejshëm politik.
Kjo fjali ra si kambanë alarmi në “veshin” e një pjese të aktivistëve të Bashkimit Demokratik për Integrim (BDI), të cilët, mes dyshimesh të thella, me mish e me shpirt kishin hyrë në një betejë politike në Gostivar, me synim që Valbon Limani të zgjidhej kryetar i komunës, si dhe Isen Shabani në Vrapçishtë.
Në rrjetet sociale, aktivistët me të madhe kanë filluar të sulmojnë Ali Ahmetin për “sakrificën” e tyre për ta shtyrë përpara “projektin” e Taravarit në Gostivar dhe Vrapçishtë duke rrezikuar, sipas tyre, të groposin jetën e tyre politike, vetëm që Taravari të mbetet politikisht “gjallë”.
Javë më parë, Frontin Evropian e braktisi edhe Aleanca e Ziadin Selës, pikërisht për shkak të asaj që ata e konsideruan “raport të pashpjegueshëm” mes Ahmetit dhe Taravarit. Të mësuar nga kjo përvojë, aktivistët e BDI-së sot ndihen të mashtruar.
Ditë më parë, BDI përmes një kumtese u bëri thirrje partive politike që, siç thonë ata, t’iu bashkëngjiten “rrugës” dhe të bëhen pjesë e formacionit politik.
