Kreu i Aleancës për Shqiptarët (ASH), Arben Taravari, ka reaguar ndaj spekulimeve të fundit që sugjeronin mundësinë e largimit të tij nga koalicioni VLEN.
Gjatë një deklarate për mediat, Taravari ka mohuar këto pretendime, duke theksuar se raportet mes partnerëve të koalicionit mbeten të mira dhe se nuk ka asnjë planifikim për dorëheqje nga posti i ministrit të shëndetësisë.
“Për koalicionin ka kohë. Për dorëheqje as që e planifikoj. Raportet midis partnerëve të koalicionit janë shumë të mira, kështu që vazhdoj të jem ministër dhe vazhdoj ta bëj punën time”, deklaroi Taravari.
Sa i përket takimit me kreun e BDI-së, Ali Ahmeti, Taravari tha e ka pasur kanale komunikimi por se takim nuk ka pasur.
Këto deklarata vijnë në një kohë kur ka pasur diskutime dhe spekulime në qarqet politike mbi stabilitetin e koalicionit VLEN dhe qëndrimin e ASH-së brenda tij.
Taravari tha se fokusi i tij mbetet tek detyrat e ministrit të Shëndetësisë dhe përmbushja e angazhimeve ndaj qytetarëve të lënduar nga tragjedia në Koçan.
