Kryetari i Kuvendit, Afrim Gashi, sot u takua me Presidentin e Republikës së Shqipërisë, Bajram Begaj.
Kryetari Gashi shprehu kënaqësi të madhe për takimin dhe theksoi se pret që miqësia dhe bashkëpunimi që ekziston ndërmjet dy vendeve në të ardhmen të përforcohet dhe avancohet edhe më tej. Në planin ndërkombëtar, të dy shtetet kanë të njëjtat qëllime dhe interesa, e kjo është anëtarësimi në Bashkimi Evropian, mbështetja e ndërsjellë si fqinj të drejtpërdrejtë dhe aleatë në NATO, si dhe thellimi i bashkëpunimit rajonal.
Ai shprehu pritjen dhe shpresën se të dy shtetet së bashku do ta vazhdojnë rrugën drejt integrimit evropian, sepse kjo është shumë e rëndësishme jo vetëm për Maqedoninë e Veriut dhe Shqipërinë, por edhe për vendet e tjera të rajonit të Ballkanit Perëndimor. Në funksion të promovimit të diplomacisë parlamentare dhe ndërtimit të marrëdhënieve bilaterale parlamentare, Kryetari Gashi theksoi se mban kontakte të rregullta me kolegët nga Parlamenti i Shqipërisë dhe se vizitat në nivelin më të lartë parlamentar zhvillohen pothuajse çdo vit.
Presidenti Begaj theksoi se Republika e Maqedonisë së Veriut dhe Shqipëria janë dy vende mike që ndajnë të njëjtat vlera, vizione dhe sfida dhe janë shembull i bashkëpunimit në rajon. Ai theksoi se është përmirësuar bashkëpunimi në shumë fusha me interes të përbashkët, në funksion të përmirësimit të standardit të jetesës së qytetarëve në të dy shtetet. Mbetet përkushtimi për bashkëpunim edhe më të madh, veçanërisht në sferën ekonomike.
Dy bashkëbiseduesit e theksuan rëndësinë dhe rolin e maqedonasve dhe shqiptarëve që jetojnë në të dy vendet dhe që përfaqësojnë një urë për ndërtimin e marrëdhënieve të qëndrueshme dhe miqësore. Lidhja e transportit të udhëtarëve, energjetike dhe hekurudhore ndërmjet dy vendeve në kuadër të Korridori VIII do të kontribuojë për një shkëmbim edhe më të madh të njerëzve, mallrave dhe shërbimeve, për të cilat ekziston një potencial i madh.
Presidenti shqiptar, Bajram Begaj, u nënshkrua në Librin e Përshtypjeve dhe mbajti fjalim para deputetëve në Kuvend.
Gashi pret në Kuvend Presidentin Begaj, riafirmohet partneriteti strategjik mes dy vendeve
