Në një zhvillim të paprecedentë që ka tronditur arenën ndërkombëtare, Izraeli ka ndërmarrë një sulm të drejtpërdrejtë ndaj udhëheqjes së Hamasit në kryeqytetin e Katarit, Doha, pasditen e së martës.
Sipas një deklarate zyrtare nga qeveria izraelite, objektivat ishin anëtarët e lartë të Hamasit, të cilët “për vite me radhë kanë drejtuar operacionet e organizatës terroriste, ishin përgjegjës për masakrën e 7 tetorit 2023 dhe kanë udhëhequr luftën kundër Shtetit të Izraelit”.
Një zyrtar i Hamasit në Gaza konfirmoi për agjencinë AFP se ekipi negociator i grupit ishte në shënjestër të operacionit në Doha. Katar ka shërbyer si ndërmjetësues kyç mes Hamasit dhe Izraelit që nga shpërthimi i luftës pas sulmeve të përgjakshme të 7 tetorit 2023.
Sipas raportimeve nga televizioni Al Arabiya, në mesin e të shënjestruarve ishin figura kyçe të Hamasit, përfshirë:
Khalil al-Hayya – kryenegociator dhe ish-zëvendës i liderit Yahya Sinwar
Khaled Meshaal – udhëheqës i diasporës së Hamasit
Muhammad Darwish – kreu i zyrës politike
Razi Hamad, Izzat al-Rishq, Zaher Jabarin dhe Nizar Awadallah
Aktualisht, nuk ka konfirmim nëse ka viktima apo të plagosur si pasojë e sulmit.
Eksperti i sigurisë Guido Olimpio ka shkruar më herët se si Meshaal dhe al-Hayya luajnë rol kyç në rrjetin ndërkombëtar të Hamasit dhe se aktiviteti i tyre është i lidhur ngushtësisht me Katarin. Meshaal, i cili dikur i shpëtoi një atentati me helm nga Mossadi, konsiderohet një strateg i rëndësishëm brenda organizatës.
Al-Hayya, ndërkohë, ka qenë ndër figurat kyçe në proceset e ndërmjetësimit në Katar, së bashku me Ghazi Ahmed dhe Mohammed Darwish, duke fituar ndikim të shtuar brenda Hamasit, pavarësisht se jeton jashtë Rripit të Gazës.
Ky sulm përfaqëson një përshkallëzim të ri dhe të rrezikshëm në konfliktin Izrael-Hamas, dhe pritet të sjellë pasoja të mëdha diplomatike, sidomos në marrëdhëniet me Katarin – një vend që deri tani ka mbajtur një rol të rëndësishëm në ndërmjetësimin e armëpushimeve dhe lirimit të pengjeve.
