Zëdhënësi i VLEN, Driton Sulejmani në intervistën “Dialog te Lajmi” ka folur edhe për buxhetin 2026 dhe shkurtimet eventuale që mund të ndodhin, ndërsa ka thënë se nuk do të preken projektet shqiptare.
Buxheti sipas tij do të jetë zhvillimor.
“Politikat buxhetore kur krijohen, krijohen edhe si rezultat i politikave të mëparshme në buxhetin e këtij viti, shteti duhet të paguajë kredinë që ka marrë gjatë kohës së pandemisë në vitin 2019 që sillet mbi 1 miliardë euro. Që të mund të paguajë shteti një borxh të tillë, pasi tani ka afatin kohor është dashur që të kemi shkurtime buxhetore në të gjitha resorët, ministri, drejtori të caktuara. Mirëpo, edhe krahas këtyre shkurtimeve, sipas mendimit tonë, buxheti që është propozuar dhe do të kalojë në Kuvend është zhvillimor që parasheh një rritje ekonomike prej 3.8 për qind, parasheh të mbajë normën e inflacionit stabile prej 2.5 për qind, me një deficit buxhetor prej 3.5 për qind e kështu me radhë”, ka thënë Sulejmani.
Ai mes tjerash ka nënvizuar se qeveria ka vendim për ta financuar ndërtimin e kampusit të ri universitar “Nënë Tereza” dhe kjo është e sigurt.
