Një stuhi e madhe ka përfshirë pjesë të Arabisë Saudite, përfshirë qytetin e Mekës, duke shkaktuar përmbytje në disa zona.
Shërbimi Meteorologjik i Arabisë Saudite ka lëshuar një alarm të kuq për Mekën, Medinën dhe qytetin port Xheda. Departamenti i Arsimit në Medinë ka publikuar foto të punëtorëve që riparojnë energjinë elektrike dhe kondicionerët, si dhe që largojnë ujin e grumbulluar. Në Dubai, përmbytjet kanë përfshirë aeroportin dhe shumë rrugë përreth, duke çuar në anulimin e dhjetëra fluturimeve. Në Arabinë Saudite ndodhen edhe shumë qytetarë të Maqedonisë së Veriut, për të kryer Umren, prandaj nga Bashkësia Islame e Maqedonisë bëjnë të ditur se qytetarët e vendit janë shëndoshë e mirë.
“Ne nuk jemi organizatorë të Umres, sepse ato organizohen kryesisht nga kompani private, si nga vendi, po ashtu edhe nga diaspora. Megjithatë po interesohemi vazhdimisht për gjendjen e tyre. Por, në bazë të informatave nga kontaktet e para që kemi realizuar, të gjithë Umrexhinjtë nga vendi ynë janë shëndoshë e mirë.”, thonë nga BFI.
