Pas marrjes së masave dhe aktiviteteve, SPB Manastir thotë se ka zbardhur incidentin e marrjes me forcë të një bluze nga një person nga Suedia, me banim në Dibër, identifikoi autorët dhe kreu intervista zyrtare me ta në stacionin policor. Pas marrjes së masave, policët identifikuan autorët, katër 17-vjeçarë dhe një 14-vjeçar, të gjithë nga Manastiri. Me urdhër gjykate, u kryen kontrolle në shtëpitë e tyre, dhe në një intervistë zyrtare në stacionin policor ata pranuan krimin.
Më 28.08.2025 në orën 19:50 në SPB Manastir, S.H.D. (32) nga Suedia, me banim në Dibër, raportoi se në rrugën “Shirok sokak” në Manastir, personat iu afruan dhe donin t’ia hiqnin bluzën, të cilën e mbante veshur, në të cilën ishte vizatuar një kokë shqiponje në pjesën e përparme dhe të pasme. Sipas raportit, ai e hoqi bluzën dhe ua dha atyre pasi kuptoi se nuk mund të mbrohej.
Pas dokumentimit të plotë të rastit, kundër individëve do të ngrihen akuza sipas nenit 319 të Kodit Penal “nxitje e urrejtjes, përçarjes ose intolerancës mbi baza kombëtare, racore, fetare dhe të tjera diskriminuese”.
Kujtojmë se Portalb.mk përmes një serie shkrimesh ka argumentuar se si mosndëshkimi i gjuhës së urrejtjes ndër vite ka rritur edhe më shumë këtë fenomen në Republikën e Maqedonisë së Veriut. Mosreagimi adekuat i MPB, prokurorisë dhe lëndëve të pakta me aktgjykim në gjykatë, e ushqejnë edhe më shumë gjuhën e urrejtjes. Këtë e vërtetuan edhe ekspertët e komunikimit politik si dhe organizatat që merren me gjuhën e urrejtjes në analizën e Portalb.mk rreth temës në fjalë.
