Zinxhiri ndërkombëtar i supermarketeve SPAR pritet të hyjë në Maqedoninë e Veriut përmes ribrandimit të marketeve Kit-Go, ndërsa sipas informacioneve jozyrtare, ekziston edhe një ofertë drejtuar Tinex-it për marrjen e hipermarketeve të tij, raporton portali Faktor.
Së shpejti, rrjeti i marketeve Kit-Go do të ribrandohet dhe do të operojë nën emrin e njohur holandez SPAR.
Rreth 60 markete Kit-Go në mbarë vendin u blenë për afërsisht 60 milionë euro nga kompania kosovare Viva Fresh Group, por aktualisht vazhdojnë të funksionojnë ende me emrin e vjetër.
Përmes SPAR-it, Viva Fresh Group po shfaq interes edhe për formatin “Super Tinex”, që përfshin markete më të mëdha me ofertë dhe shërbime të zgjeruara, të cilat Tinex i ka hapur në objekte të mëdha, si ai në East Gate Mall.
Tinex zotëron gjithsej 14 hipermarkete të këtij formati:
• 3 në Komunën e Aerodromit
• 3 në Qendër
• 2 në Gazi Babë
• 2 në Karposh
• nga 1 në Kisella Vodë, Ohër, Prilep, Strumicë dhe Ilinden
Më herët, në media u publikua edhe informacion se zinxhiri holandez planifikon të hapë një market në Kavadar. Nga komuna kanë deklaruar se, sipas informacioneve të tyre, kompania tashmë po kërkon një lokacion të përshtatshëm. Në rajon, SPAR është i pranishëm në Kosovë dhe Shqipëri.
Në muajin mars të këtij viti, Viva Fresh Group, i cili është i pranishëm në Maqedoninë e Veriut përmes Viva Fresh Store, Super Kit Go dhe Modern Studio & Top Shop, e mori në pronësi SPAR Albania nga Balfin Group.
SPAR është themeluar në vitin 1932 dhe sot është i pranishëm në rreth 48 vende të botës, me mbi 13.900 dyqane. Aktualisht, zinxhiri nuk ka markete aktive në Maqedoninë e Veriut.
Nga Tinex kanë deklaruar jozyrtarisht se do të komentojnë vetëm në rast të arritjes së një marrëveshjeje përfundimtare, ndërsa për momentin theksojnë se bëhet fjalë për thashetheme të zgjeruara. Interesimi i SPAR-it për hyrje në tregun maqedonas kishte ekzistuar edhe para fillimit të pandemisë së COVID-19.
