Sot nis procesi gjyqësor për njërën nga tragjeditë më të mëdha në vend, zjarrin në diskotekën Pulse në Koçan. 35 persona fizikë dhe tre persona juridikë, mes tyre edhe ish-kryetarë komunash dhe ministra, do të ulen në bankën e të akuzuarve, ndërsa institucionet premtojnë se gjithçka është gati që procesi gjyqësor të zhvillohet pa asnjë pengesë.
Tetë muaj pas zjarrit në klubin e natës “Pulse” në Koçan, nesër, nën organizim të Gjykatës Penale Shkup, nën protokolle të forta sigurie dhe me mbrojtje të gjerë policore, në sallën digjitale të gjykatës në Idrizovë sot do të nisë procesi gjyqësor për një nga tragjeditë më të mëdha në historinë e re të vendit.
Të gjitha rrugët sot në mëngjes do të çojnë drejt Idrizovës, jo në burg, por në sallën e re të pajisur digjitale të gjykatës, e cila, sipas organeve kompetente, është e vetmja që i plotëson të gjitha kushtet teknike, por edhe kapacitetet hapësinore për gjithsej 35 persona fizikë dhe përfaqësues të 3 personave juridikë që të ulen në bankën e të akuzuarve. Nga Gjykata Penale sigurojnë se gjithçka është e përgatitur për procesin gjyqësor për tragjedinë në Koçan, ndërsa një javë më parë, në një brifing me gazetarët, gjyqtarët, prokurorët, por edhe avokatët, u zotuan se do të bëjnë gjithçka që të mos ketë shtyrje të panevojshme të seancave. Kryetarja e Gjykatës Penale tha se mungesat e mundshme nga seancat për shkak të sëmundjes do të jenë nën monitorim serioz, pra do të kontrollohen në detaje të gjitha vërtetimet mjekësore. Prokuroria do të paraqitet me 15 prokurorë që e udhëheqin rastin, dhe pritet që të gjithë pa përjashtim të marrin pjesë në seancën e parë nesër. Procesin do ta udhëheqë gjyqtarja Daniela Gruevska Ilievska, ndërsa prindërit e viktimave, në prag të seancës, në protestën e së shtunës në Shkup, i dërguan një mesazh asaj se presin një gjykim të drejtë dhe transparent. Të gjitha personat fizikë dhe juridikë janë të akuzuar për vepra të rënda kundër sigurisë së përgjithshme, ndërsa mes të akuzuarve janë pronarët e klubit të natës “Pulse”, personi juridik që siguronte objektin, tre ish-kryetarë të komunës së Koçanit, dy ish-ministra të ekonomisë, si dhe anëtarë të sigurimit të klubit të natës. Në zjarrin që shpërtheu më 16 mars të këtij viti, humbën jetën gjithsej 63 persona, ndërsa rreth 200 u lënduan. /Alsat.mk
