Drejtori i Teatrit të Tetovës, Hasim Memishi, ka reaguar pas kërkesave për dorëheqjen e tij, vetëm 10 muaj pas emërimit në krye të këtij institucioni.
“Po të mos ishte për të qeshur, do ishte për të qarë! Kërkojnë dorëheqjen time, kur unë jam emëruar vetëm 10 muaj më parë. Nuk dua kurrë të dal e të jap sqarime për punën time, por këta nuk kanë pardon”, ka deklaruar Memishi.
Ai ka renditur disa nga punët dhe arritjet gjatë kësaj periudhe:
• Shlyerjen e të gjitha borxheve të Teatrit,
• Dhënien e 12 vendimeve pune të përhershme,
• Përmirësimin e kushteve të punës në administratë,
• Hapjen e konkursit për 4 vende pune kyçe, ku përzgjedhja do të bëhet pas zgjedhjeve,
• Rritjen e buxhetit të Teatrit me 25% krahasuar me vitin paraprak,
• Për herë të parë, ndarjen e buxhetit nga Komuna për shfaqje për fëmijë,
• Hapjen e dyerve të Teatrit për regjisorë ndërkombëtarë.
Memishi theksoi se nuk ka përfituar asgjë personale nga Teatri, madje as telefon zyrtar, dhe kërkoi kohë për të dëshmuar suksesin e tij në menaxhim.
“Ju ia keni marrë kompetencat Teatrit për të menaxhuar me objektin e ri. Do të mbyteni në llumin që keni ndërtuar vetë për vite me radhë”, përfundoi reagimin e tij drejtori i Teatrit.
