Sonte ndizen dritat e bredhit të dekorimit të sheshit të Shkupit. Festat e fundvitit sivjet do të festohen në qendër të kryeqytetit. Në koncertin madhështor që do mbahet më datë 31 dhjetor pritet të këndojnë disa nga yjet e muzikës maqedonase. Dy prej tyre vetëm se paralajmëruan një atmosferë të zjarrtë!
“Do të jetë festë e çmendur! Do ta provojmë të bëjmë një celebrim të krisur, nuk premtojmë asgjë por ne do të përpiqemi të jetë më së miri. Ne do të jemi ashtu siç jemi, pastaj…!”
Në mbrëmjen e këtij koncerti nuk do të interpretojë asnjë këngëtar shqiptar. Kreu i Qytetit të Shkupit Orce Gjeorgjievski theksoi performnacë në shqip do të kenë fëmijët gjatë ditës .
“Mendoj se ka në pjesën e fëmijëve grupe që janë edhe performues shqiptarë, do të merrni informata më të detajuara më vonë nga kabineti e Qytetit të Shkupit. Përgjithësisht nga yjet që interpretojnë në mbrëmje nuk ka, por mendoj se ka në pjesën e fëmijëve këngëtarë shqiptarë, por do të ju informojmë”, tha Orce Gjeorgjievski.
Gjeorgjievski gjithashtu njoftoi se në sheshin qendror të Shkupit, nuk do të ketë fishekzjarrë kur akrepat e orës do të arrijnë orën 12:00 të mesnatës.
“Kategorikisht nuk lejoj celebrim me fishekzjarrë. Edhe pse kishte mendime të ndara për të njëjtën, sa i përket iniciativës së dal nga seanca e Këshillit, ne nuk jemi kompetent të japim leje apo miratime. Dihet që kompetentë janë MPB dhe nëse i duket më rëndësi publikut, unë e mbështesë këtë që në vend të fishekzjarrëve të festojmë në mënyrë alternative në këtë celebrim. Dhe të jem më preciz Qyteti i Shkupit nuk do të përdorë fishekzjarrë ne festen e Vitit të Ri”, deklaroi Orce Gjeorgjievski.
Dekorimi i shesheve dhe bulevardeve do të filloj nga sot dhe do të jetë i stolisur deri nga java e tretë e janarit, përkatësisht nga 20 janari. Edhe marketi i festave do të jetë i hapur për më shumë se një muaj, që do të mundësoj qytetarëve të shijojnë magjinë e festave sikurse në metropolet e tjera të rajonit dhe të Evropës. Dekorimi i qytetit do të kushtojë 70 mijë euro, ndërsa koncerti qendror do të financohet nga video-lotaria shtetërore e Maqedonisë.
